MNS Shiv Sena alliance News Raj Thackeray Eknath Shinde meeting : मुंबई महानगरपालिकेच्या निवडणुकीच्या आधी राज्यात नव्या युतीचे संकेत मिळाले आहे. एकनाथ शिंदे यांची शिवसेना आणि राज ठाकरेंच्या मनसेमधील दुरावा संपला आहे. उपमुख्यमंत्री एकनाथ शिंदे आणि मनसे प्रमुख राज ठाकरे यांची मंगळवारी रात्री भेट झाली. या भेटीनंतर महाराष्ट्राच्या राजकारणात नवे समीकरण जुळणार का? अशी चर्चा सुरू झाली आहे. राज ठाकरे यांच्या भेटीनंतर एकनाथ शिंदे यांनी दिलेल्या दिलेल्या प्रतिक्रियेनंतर मनसे शिसवेना युतीच्या चर्चा सुरू झाल्या आहेत.

राज ठाकरे आणि एकनाथ शिंदे यांच्या भेटीमुळे मुंबई महानगरपालिका निवडणुकीच्या पार्श्वभूमीवर शिवसेना आणि मनसे यांच्यात युती होण्याच्या शक्यतेवर चर्चा सुरू झाल्या आहेत. विधानसभा निवडणुकीनंतर दोन्ही पक्षांमध्ये दुरावा निर्माण झाला होता. राज ठाकरे यांनी यासाठी एकनाथ शिंदे यांच्यावर थेट आरोपही केले होते. मात्र, आता ही भेटीनंतर कटुता संपली असून ही नव्या राजकीय समीकरणांची सुरुवात ठरू शकते, असा अंदाज राजकीय विश्लेषक व्यक्त करत आहेत.

भेटीमागील हेतू काय, एकनाथ शिंदे काय म्हणाले?

एकनाथ शिंदे यांनी भेटीनंतर प्रसारमाध्यमांशी संवाद साधताना ही भेट राजकीय नसल्याचं म्हटलं. “ही एक मैत्रीपूर्ण भेट होती. आम्ही बाळासाहेब ठाकरे यांच्या विचारांवर, विकासकामांवर आणि इतर विषयांवर चर्चा केली. प्रत्येक भेटीला राजकीय रंग देण्याची गरज नाही,” असं शिंदे यांनी स्पष्ट केलं. या भेटीला शिवसेनेचे नेते आणि मंत्री उदय सामंत हेही उपस्थित होते. राज ठाकरे यांनी दिलेल्या स्नेहभोजनाच्या निमंत्रणाला मान दिल्याचं शिंदे यांनी सांगितलं.

पुढे काय?

राज ठाकरे आणि एकनाथ शिंदे यांच्या या भेटीमुळे महायुतीच्या रणनीतीत बदल होण्याची शक्यता आहे. मनसे आणि शिवसेना यांच्यात युती झाल्यास मुंबई महानगरपालिकेत सत्ताधारी शिवसेनेला (शिंदे गट) बळ मिळू शकतं. मात्र, ही भेट खरोखरच स्नेहभोजनापुरती मर्यादित होती की युतीच्या दृष्टीने पडताळणी, हे येत्या काळात स्पष्ट होईल. सध्या तरी या भेटीने राजकीय वातावरण तापलं असून तर्कवितर्क लावले जात आहेत.