• मुंबईत मोठी राजकीय घडामोड

• उद्धव ठाकरेंना मोठा धक्का

• बड्या नेत्याने पक्षाची सोडली साथ

• ५०० कार्यकर्त्यांसह करणार शिंदेगटात प्रवेश

• अनिल परब यांचे निकटवर्तीय

राज्याच्या राजकारणातून मोठी बातमी समोर आली आहे. उमुख्यमंत्री एकनाथ शिंदे यांनी उद्धव ठाकरे यांना मोठा धक्का दिला. 'ऑपरेशन टायगर' अंतर्गत ही मोठी राजकीय घडामोड घडली आहे. एकनाथ शिंदे यांनी मोठी खेळी करत उद्धव ठाकरेंना मातोश्रीच्या अंेगणातच मोठा झटका दिला. बड्या नेत्याने उद्धव ठाकरे यांची साथ सोडली असून आज संध्याकाळी ते ५०० कार्यकर्त्यांसह शिवसेना शिंदेगटामध्ये प्रवेश करणार आहेत.

शिवसेना शाखा क्रमांक ९२ चे शाखाप्रमुख रामशरण चांदेलिया हे शिंदेगटात प्रवेश करणार आहेत. रामशरण चांदेलिया हे अनिल परब यांचे निकटवर्तीय मानले जातात. ५०० हून अधिक समर्थकांसह आज त्यांचा भव्य पक्षप्रवेश सोहळा होणार आहे. उपमुख्यमंत्री एकनाथ शिंदे यांच्या उपस्थितीत ते शिवसेनेचे धनुष्यबाण हाती घेणार आहेत. शिवसेना विभागप्रमुख कुणाल सरमळकर यांच्या नेतृत्वाखाली या पक्षप्रवेश सोहळ्याचे आयोजन करण्यात आले आहे.

अंधेरीतील शेरे पंजाब ग्राउंड येथे रामशरण चांदेलिया हे ५०० कार्यकर्त्यांसह शिंदेसेनेत प्रवेश करणार आहेत. या पक्षप्रवेशामुळे स्थानिक राजकारणात शिवसेनेची ताकद वाढणार असल्याची चर्चा सुरू आहे. 'ऑपरेशन टायगर' मोहिमेला शिनवसेना शिंदेसेनेला नवे बळ मिळणार आहे. या पक्षप्रवेशामुळे वांद्र्यामध्ये उद्धव ठाकरेंच्या शिवसेनेची ताकद कमी होऊन शिंदेंच्या शिवसेनेची ताकद वाढली आहे.