अक्षय बडवे, साम टीव्ही

राज्यभरात महापालिका निवडणुकांची धामधूम पाहायला मिळत आहे. काही ठिकाणी सत्ताधारी पक्षांची युती झाली आहे. तर काही ठिकाणी युती फिसकटल्याचंही पाहायला मिळत आहे. या निवडणुकीत अजित पवारांच्या राष्ट्रवादीची भूमिका निर्णायक ठरणार आहे. विशेष म्हणजे पुण्यात अजित पवार काय भूमिका घेतात, याकडे साऱ्यांचे लक्ष लागलं आहे. मात्र, निवडणुकीच्या या धामधुमीत उपमुख्यमंत्री अजित पवार अचानक नॉट रिचेबल झाल्याने राजकीय वर्तुळात चर्चांना उधाण आलं आहे.

पुण्यातील जिजाई बंगल्यातून बाहेर पडून अजित पवार गेले कुठे याची चर्चा सुरू झाली. बंगल्यावर होत असलेल्या गर्दीमुळे अजित पवार वैतागून अज्ञातस्थळी गेल्याची चर्चा आहे. त्यात पुण्यातील शिवसेनेच्या प्रस्तावावर सुद्धा अजूनही अजित पवारांच्या राष्ट्रवादीकडून कुठलंही उत्तर नाही. उमेदवारी अर्ज भरण्यासाठी उद्या दुपारी तीन वाजेपर्यंत अखेरची मुदत आहे.

अन् अजित पवार दिसले

'नॉट रिचेबल' झालेले अजित पवार पुन्हा कार्यकर्त्यांना दिसले. अजित पवारांची एका कारने एन्ट्री झाली. यावेळी अजित पवारांच्या हातात काही प्रभागांची नावे होती. गाडीत बसल्यावर अजित पवारांच्या हातातील प्रभागाबाबत काय निर्णय झाला, यावरून चर्चा सुरू झाली आहे. कारमध्ये असलेल्या अजित पवारांच्या हातात एक कागद दिसला. या कागदावर विविध प्रभागांची नावे पाहायला मिळाली.

पुण्यात उमेदवारांना अद्याप एबी फॉर्म नाही

पुण्यात दोन्ही राष्ट्रवादीकडून अद्याप उमेदवारांना एबी फॉर्म मिळालेला नाही. अद्यापही दोन्ही पक्षाकडून उमेदवारांना AB फॉर्मचे वाटप झालेलं नाही. अजित पवार यांच्यासोबत बैठक झाल्यानंतर शरद पवार यांच्या पक्षाच्या पदाधिकाऱ्यांनी सुप्रिया सुळे यांना फोन केला. त्यांनी सुप्रिया सुळे यांना बैठकीतील सगळी माहिती देण्यात आली. आज रात्री पुन्हा दोन्ही राष्ट्रवादीची बैठक होणार आहे.