मुंबईतील वर्सोवामधील राजकारणाचा पारा चांगलाच तापलाय. ठाकरे गटानंतर आता शिंदे गटातही येथे बंडखोरी झाली आहे. शिंदे गटाचे वर्सोवा विधानसभा विभाग प्रमुख अल्ताफ पेवेकर यांनी बंड पुकारत अपक्ष उमेदवारी अर्ज दाखल केला आहे. त्यामुळे भाजप उमेदवार आणि शिवसेनेचं टेन्शन वाढलंय.

अपक्ष उमेदवारी अर्ज दाखल केल्यानंतर त्यांनी पक्षाच्या निर्णयावर टीका केली. स्थानिकांची अपेक्षा डावलवत शिंवसेनेची जागा भाजपला देण्यात आली. त्यामुळे पक्षात इतकी वर्ष काम करून काय उपयोग असा सवालही पेवेकर यांनी केलाय.

अल्ताफ वॉर्ड क्रमांक ५९ मधून उमेदवारी मिळावी, यासाठी त्यांनी जोरदार तयारी केली होती. मात्र हा वॉर्ड भाजपाकडे गेल्याने ते नाराज झाले. त्यामुळे त्यांनी पक्षाच्या निर्णयाविरोधात जात अपक्ष उमेदवारी अर्ज दाखल केलाय. “इतकी वर्षे काम करूनही सीट मिळत नसेल, तर त्या पक्षात काम करून काय फायदा?” असा सवाल अल्ताफ पेवेकर यांनी यावेळी केला. पेवेकरांमुळे वॉर्ड ५९ भाजपला दिल्यामुळे शिवसेना शिंदे गटातील असंतोष आता उघडपणे समोर आलीय.

इतकी वर्षे काम करूनही सीट मिळत नसेल, तर...

शिवसेनेचे निष्ठावंत कार्यकर्ते असतानाही बंडखोरी का केली असा सवाल केल्यानंतर अल्ताफ पेवेकर म्हणाले, हा ५९ वार्ड शिवसेनेचा वॉर्ड आहे. तेथे मी उपमुख्यमंत्री एकनाथ शिंदे आणि वायकर यांच्या नेतृत्त्वाखाली पक्षाचं काम खूप केलंय. ही जागा शिवसेनेच्या हक्काची आहे. आणि शिवसैनिक आपल्या हक्कासाठी पेटवून उठत असतो. येथील लोकांना स्थानिक उमेदवार हवा होता. विरोधीपक्षानेही येथे बाहेरील उपऱ्या उमेदवार दिलाय. येथील लोकांना हे मान्य नाहीये.

ठाकरे गटातही बंडखोरी

दरम्यान आज अनेक ठिकाणी नाराज उमेदवारांचा राडा पाहायला मिळाला. शिवसेनेसह भाजप आणि ठाकरे गटात बंडखोरी झाली आहे. वर्सोवा प्रभाग क्रमांक ५९ मध्ये शिवसेना (उद्धव बाळासाहेब ठाकरे) गटात मोठी बंडखोरी झाली. येथे शैलेश फणसे यांना उमेदवारी जाहीर होताच स्थानिक इच्छुकांमध्ये नाराजी पसरली आहे.

या नाराजीचे रूपांतर थेट बंडात झाले. इच्छुक उमेदवार सचिन शिवेकर यांनी हजारो कार्यकर्ते आणि समर्थकांच्या उपस्थितीत आपला उमेदवारी अर्ज भरत ताकद दाखवली. “प्रभाग आणि विधानसभेच्या बाहेरचा उमेदवार लादण्यात आला” असा आरोप करत स्थानिक कार्यकर्ते आणि नागरिकांनी उघडपणे पक्ष नेतृत्वावर नाराजी व्यक्त केलीय. दरम्यान बाहेरच्या’ उमेदवारामुळे मतदारांमध्ये अस्वस्थता वाढली असून, केवळ ठाकरे गटच नव्हे तर भाजपानेही बाहेरचा उमेदवार दिल्याने सर्वच प्रमुख पक्षांबाबत नाराजीचा सूर उमटत आहे.