>> संजय गडदे

Marathi Falak News:

मुंबईत सध्या मराठी आणि गुजराती भाषिक वाद चांगलाच पेटला असल्याचे पाहायला मिळत आहे. दोन दिवसापूर्वी मुंबईच्या घाटकोपर परिसरातील 'मारू घाटकोपर' नावाचा बोर्ड शिवसेना ठाकरे गटाच्या कार्यकर्त्यांकडून तोडण्यात आला.

नंतर त्या ठिकाणी माझे घाटकोपर अशा नावाचा फलक लावण्यात आला. हे प्रकरण ताजे असतानाच आता मुंबईच्या पश्चिम उपनगरातील मालाड पूर्वेकडील पश्चिम द्रुतगती महामार्गावरील जागृती केंद्र प्रवासी बस स्थानकावर गुजराती भाषेत असलेल्या फलकावर देखील मराठी एकीकरण समितीने आक्षेप घेतला.

तसेच आज मराठी एकीकरण समितीच्या कार्यकर्त्यांकडून त्या बसस्थानकावर असलेल्या गुजराती भाषेतील फलकाला काळे फासण्यात आले. महाराष्ट्रात मराठी हीच भाषा प्रामुख्याने वापरली गेली पाहिजे. (Latest Marathi News)

जिथे जिथे इतर भाषा लादल्या जातील, त्या सर्वच ठिकाणी लवकरच मराठी एकीकरण समितीच्या वतीने आंदोलन पुकारले जातील. इतर भाषेतील फलक काढून टाकण्याचं काम केले जाईल, असा इशारा मराठी एकीकरण समितीकडून देण्यात आला आहे.

दरम्यान, याआधी घाटकोपर येथे 'मारु घाटकोपर' असं गुजराती भाषेतील फलक लागलं होत. यावरून मोठा वाद निर्माण झाला होता. यानंतर ठाकरे गटाच्या कार्यकर्त्यांनी हे फलक तोडले.