केतन अग्रवाल खून प्रकरणानंतर गेल्या काही दिवसांपासून लोहगडावरील एका कड्याचा "Siya Point" असा उल्लेख समाजमाध्यमांवर आणि काही डिजिटल माध्यमांमध्ये केला जातोय. याच गोष्टीला अखिल महाराष्ट्र गिर्यारोहण महासंघाने विरोध करत थेट मुख्यमंत्री देवेंद्र फडणवीस यांना पत्र लिहिले आहे.

अखिल महाराष्ट्र गिर्यारोहण महासंघाने या संदर्भात महाराष्ट्राचे मुख्यमंत्री यांना निवेदन सादर करून तातडीने हस्तक्षेप करण्याची मागणी केली आहे. लोहगड हा केवळ पर्यटनस्थळ नसून महाराष्ट्राच्या दुर्गवैभवाचा एक महत्त्वपूर्ण ऐतिहासिक वारसा आहे. महाराजांच्या स्वराज्य स्थापनेचा तो साक्षीदार असून लाखो शिवप्रेमी यांच्यासाठी तो श्रद्धेचे स्थान आहे अशा गडाची ओळख एखाद्या दुर्दैवी गुन्हेगारी घटनेशी जोडणे, त्या ठिकाणाला नवीन नाव देणे किंवा त्यावर मीम्स, रील्स करणे आपल्या इतिहासाचा आणि समाजाच्या भावनांचा अवमान असल्याचं निवेदनात म्हटलं आहे.

"Siya Point"सह सर्व आक्षेपार्ह व दिशाभूल करणारे डिजिटल उल्लेख तात्काळ हटविण्यात यावेत तसेच Google Maps आणि इतर डिजिटल प्लॅटफॉर्मवरील चुकीची नामकरणे रद्द करण्यात यावीत अशी मागणी करण्यात आली आहे.

सिया पॉइंट' हे नाव इंटरनेटवर लोकेशन म्हणून प्रसिद्धी मिळवत आहे. यामुळे लोहगडासारख्या ऐतिहासिक किल्ल्याची आणि जागतिक वारसा स्थळाची बदनामी होतेय. यामध्ये मुख्यमंत्र्यांनी हस्तक्षेप करावा अशी मागणी अखिल महाराष्ट्र गिर्यारोहण महासंघाने केलीय. त्यासाठी त्यांनी मुख्यमंत्र्यांना त्यासाठी पत्र लिहलं आहे.

स्थानिक नागरिक, इतिहासकार आणि शिवप्रेमींनी अशा नावांचा वापर थांबवण्याची मागणी केली आहे. स्थानिकांचे म्हणणे आहे की, शिवाजी महाराजांच्या पराक्रमाचा साक्षीदार राहिलेला लोहगड किल्ला अशा गुन्ह्यांमुळे बदनाम होऊ नये. दरम्यान या हत्याकांडामुळे राज्यभरातील लोकांमध्ये लोहगड किल्ल्याबाबत एक चुकीचा समज निर्माण होत आहे.