पुणे जिल्ह्यातील इंदापूरमधून एक धक्कादायक घटना समोर आली आहे. एका हॉटेलपासून ५०० ते ७०० मीटर अंतरावर एका पुरूषाच्या डाव्या पायाचा अर्धा भाग आढळून आला आहे. बुधवारी सकाळच्या सुमारास स्थानिकांना हा अर्धा पाय आढळला. या घटनेची माहिती मिळताच पोलिसांनी घटनास्थळी धाव घेतली. तसेच तपासाला सुरूवात केली. हा पाय नेमका कुणाचा आहे? याचा शोध पोलिसांकडून सुरू आहे.

मिळालेल्या माहितीनुसार, ही धक्कादायक घटना इंदापूर तालुक्यातील कळंब गावाच्या हद्दीत कळंब नीमसाखर रोडवर घडली. घटनेची माहिती पोलिसांना मिळताच पोलीस स्टेशनचे हाऊस ऑफिसर राजकुमार डुंगे हे घटनास्थळी दाखल झाले. प्राथमिक माहितीनुसार, रस्त्यावर पडलेला मानवी पायाचा भाग हा पुरूषाचा आहे. या घटनेचा अधिक तपास करण्यासाठी पोलिसांनी घटनास्थळी धाव घेतली.

या घटनेबाबत पोलिसांनी सांगितले की, बुधवारी सकाळी हॉटेलच्या काही अंतरावर अर्धा कापलेला पाय आढळला. पायात मोजे देखील दिसत आहे. हा पाय एका पुरूषाचा असल्याची माहिती आहे. मात्र, हा पाय नेमका कुणाचा आहे? हे अद्याप समोर आलेलं नाही. या प्रकरणाचा तपास सुरू असून, लवकरच माहिती समोर येईल.

स्थानिक रहिवाशांनी सांगितले की, सकाळी काही लोक परिसरात बाहेर फिरायला गेले होते. त्यांना हॉटेलच्या बाहेर तुटलेला पाय दिसला. परिसरातील लोकांमध्ये भीतीचे वातावरण निर्माण झाले आहे. पाय दिसल्यानंतर याची माहिती स्थानिकांनी पोलिसांना दिली. सध्या पोलिसांकडून तपास सुरू आहे.