मुंबई: शिवसेनेचे (Shivsena) नेते आमदार अनिल परब यांच्या अडचणीत आणखी वाढ होणार असल्याचे बोलले जात आहे. दापोली येथील रिसॉर्ट पाडण्याचे मुख्यमंत्री एकनाथ शिंदे यांनी आदेश दिल्याची माहिती भाजप नेते किरीट सोमय्या यांनी आज दिली आहे. गेल्या काही दिवसापूर्वी किरीट सोमय्या यांनी अनिल परब यांच्यावर आरोप केले होते. आमदार परब यांची ईडीने (ED) चौकशी केली होती.

अनिल परब यांचे रिसॉर्ट पोडण्याचे आदेश दिले आहेत. भारत सरकारने हा रिसॉर्ट बेकायदेशीर घोषित केला होता. सरकारने हा रिसॉर्ट पाडण्याचे आदेश दिले होते, पण हा रिसॉर्ट पाडले नव्हते. शनिवारी मी दापोलीमध्ये जाणार आहे, अशी माहिती किरीट सोमय्या यांनी दिली आहे.

हे देखील पाहा

या रिसॉर्टची घरपट्टी अनिल परब (Anil Parab) नेहमी भरतात. त्यामुळे हे रिसॉर्ट अनिल परब यांचेच असल्याचा दावा सोमय्या यांनी केला आहे. कोविड काळात लोक घरी होते पण अनिल परब दापोलीत रिसॉर्ट बांधण्यात व्यस्त होते, असंही किरीट सोमय्या म्हणाले.

माजी मुख्यमंत्री उद्धव ठाकरे यांनी यावर कोणतीही कारवाई केली नव्हती, पण आताचे मुख्यमंत्री एकनाथ शिंदे यांनी हे रिसॉर्ट पाडण्याचे आदेश दिले आहेत, असंही सोमय्या म्हणाले. गेल्या काही दिवसापूर्वी परब यांची ईडीने चौकशी केली आहे. सलग दोन दिवस त्यांची चौकशी सुरू होती. तर दुसरीकडे अनिल परब यांनी या रिसॉर्टशी आपला कोणताही संबंध नसल्याचे म्हटले आहे.