संघर्ष गांगुर्डे, कल्याण

कल्याण डोंबिवली महानगरपालिकेतून मोठी बातमी समोर आली आहे. पालिकेत उबाठा गटाचे निवडून आलेले नॉट रिचेबल नगरसेवक कोणत्याही गटा सामील न झाल्याने त्यांना अंतिम इशारा देण्यात आला आहे. तसेच नगरसेवकांचे सदस्य पद रद्द करण्याची प्रक्रिया कोकण विभागीय आयुक्तांना करण्याचे आदेश देण्यात आले आहेत. याबाबतचा खुलासा येत्या ४८ तासात देण्यात यावा असे जिल्हा प्रमुखांकडून सांगण्यात आले आहे.

महापालिका निवडणुकीत उद्धव सेनेचे ११ नगरसेवक निवडून आले. निडणूकीचा निकाल लागताच उद्धव सेनेचे नगरसेवक राहूल कोट, मधूर म्हात्रे, किर्ती ढोणे, स्वप्नीनी केणे हे चार नगरसेवक नॉट रिचेबल झाले. महापौर पदाच्या निवडणूकीत किर्ती ढोणे हजर झाल्या. मात्र कोट, म्हात्रे, केणे हे तीन नगरसेवक गैरहजर राहिले. पक्षाने त्यांचे गट स्थापन केले. ही गट स्थापन करण्याची प्रक्रिया कोकण विभागीय आयुक्तांकडे करण्यात आली. मात्र कोकण विभागीय आयुक्तांनी उद्धव सेनेचे निवडून आलेले ११ नगरसेवक असे नमूद केले आहे.

११ नगरसेवकांनी त्यांची सदस्य नोंदणी केली आहे. त्यामुळे जे ३ नगरसेवक कोणत्याही गटात सहभागी झाले नसले तरी ते उद्धव सेनेच्या गटात असल्याचे कोकण विभागीय आयुक्तांनी स्पष्ट करावे. मत्र कोकण विभागीय आयुक्तांनी त्यावर उत्तर देताना ते कोणत्याही गटात सहभागी नाहीत हे स्पष्ट केले. मात्र ते उद्धव सेनेच्या गटात गणले जातील असे स्पष्ट केलेले नाही.

या पश्चात पक्षाचे जिल्हा प्रमुख शरद पाटील यांनी नगरसेवकांना अंतिम नोटिस बजावली आहे. त्यांनी गट स्थापनेच्या प्रक्रियेत सहकार्य केले नाही. ही कृती पक्षाच्या विरोधात आहे. या तीन सदस्यांनी स्वइच्छेने पक्षाचा त्याग केला असे मानले जाऊ शकते. पक्षाने या बाबत वारंवार विचारणा केली. तसेच खुलासा मागितला. त्याचा खुलासा ३ नगरसेवकांनी दिलेला नाही. ही अंतिम नोटिस असल्याने ४८तासात खुलासा केला नाही तर कोकण विभागीय आयुक्तांकडून नगरसेवक अपात्रेतीची कारवाई केली जाईल असा या अंतिम नोटिसद्वारे इशारा देण्यात आला आहे.