संघर्ष गांगुर्डे, कल्याण

कल्याण डोंबिवली महानगरपालिकेच्या कारभारातील गळथान कारभार पुन्हा एकदा समोर आला आहे. काही दिवसांपूर्वी मयत आणि सेवेतून निवृत्त कर्मचाऱ्यांच्या बदल्यांचे आदेश निघाल्याचा प्रकार ताजा असतानाच, आता टिटवाळ्यातील कातकरी पाड्यात राहणाऱ्या एका आदिवासी विधवा महिलेला तब्बल २ लाख ३३ हजार रुपयांचा मालमत्ता कर भरण्याची नोटीस पाठविण्यात आली आहे.

महापालिकेच्या मालमत्ता कर वसुली विभागाने ही नोटीस पाठवली असून, ठरावीक कालावधीत कर न भरल्यास संबंधित महिलेच्या झोपडीवर जप्तीची कारवाई केली जाईल, असा इशाराही देण्यात आला आहे. या नोटीसमुळे सदर महिला प्रचंड मानसिक तणावात सापडली आहे.

टिटवाळा हा परिसर केडीएमसी हद्दीत येतो आणि प्रभाग क्रमांक एकच्या कार्यालयांतर्गत समाविष्ट आहे. टिटवाळ्यातील गणेश विद्यालयाजवळ असलेल्या कातकरी पाड्यात सुमित्रा उर्फ पारु बळीराम कातकरी ही आदिवासी विधवा महिला आपल्या कुटुंबासह वास्तव्यास आहे. अत्यंत हलाखीच्या परिस्थितीत राहणाऱ्या या महिलेच्या झोपडीला महापालिकेने थेट २.३३ लाख रुपयांचा मालमत्ता कर आकारल्याने आश्चर्य व्यक्त होत आहे.

सुमित्रा कातकरी या विधवा असून घरात कमावता पुरुष नाही. तीन मुलांचा उदरनिर्वाह त्या इतरांच्या घरात धुणीभांडी करून मिळणाऱ्या तुटपुंज्या उत्पन्नावर चालवतात. अशा परिस्थितीत एवढ्या मोठ्या रकमेचा कर भरणे अशक्य असल्याचे त्यांनी सांगितले. झोपडी विकली तरीही १० हजार इतकी रक्कम उभी राहणार नाही, अशी हतबल प्रतिक्रिया त्यांनी व्यक्त केली आहे.

महापालिकेने पाठविलेल्या या नोटीसमुळे प्रशासनाच्या संवेदनशीलतेवर गंभीर प्रश्नचिन्ह उपस्थित झाले आहे. आधीच गोंधळलेल्या निर्णयांमुळे चर्चेत असलेल्या केडीएमसीने आता एका गरीब आदिवासी विधवा महिलेवर कराचा बोजा टाकून अजब कारभाराचा आणखी एक नमुना समोर आणल्याची टीका होत आहे.

या प्रकरणाचा श्रमजीवी संघटनेने तीव्र निषेध केला असून, केडीएमसी प्रशासनाला जाब विचारण्यात येणार असल्याचे स्पष्ट केले आहे. संबंधित आदिवासी महिलेच्या पाठीशी संघटना ठामपणे उभी राहणार असल्याचेही श्रमजीवी संघटनेने जाहीर केले आहे.