संघर्ष गांगुर्डे, कल्याण

Kalyan Railway Station Youth Electric Shock Incident कल्याण स्थानकावर आज एक धक्कादायक आणि थरारक घटना घडली आहे. ओव्हरहेड इलेक्ट्रिक खांबावर अचानक एक तरुण चढला. तो एका खांबावरून दुसऱ्या खांबावर पळ काढत होता त्याच दरम्यान तरुणाला विजेचा जोरदार धक्का बसल्याने तो गंभीर जखमी झाला आहे. या घटनेमुळे काही काळ रेल्वे सेवा विस्कळीत झाली होती.

मिळालेल्या माहितीनुसार, संबंधित तरुण अचानक OHE खांबावर चढल्याने स्थानक परिसरात एकच खळबळ उडाली. परिस्थितीचे गांभीर्य लक्षात घेता प्रशासनाने तत्काळ कल्याण डाउन लाईनचा वीजपुरवठा बंद केला. त्यामुळे काही काळ रेल्वे वाहतूक ठप्प झाली होती. या दरम्यान २ मेल/एक्सप्रेस गाड्या तसेच काही लोकल गाड्या उशिराने धावत होत्या.

घटनेची माहिती मिळताच अग्निशामक दल आणि रेल्वे प्रशासन तातडीने घटनास्थळी दाखल झाले. मात्र, पोलिस आणि बचाव पथकाला चकवा देत संबंधित तरुण एका खांबावरून दुसऱ्या खांबावर चढत असल्याने बचावकार्य अधिक कठीण झाले. अखेर, विजेचा तीव्र धक्का बसल्याने तो तरुण खाली कोसळला.

गंभीर जखमी अवस्थेत त्याला तातडीने रिक्षाच्या माध्यमातून जवळच्या रुग्णालयात हलविण्यात आले. सदर घटनेमागील कारण अद्याप स्पष्ट झाले नसून पोलिसांकडून पुढील तपास सुरू आहे. या प्रकारामुळे स्थानक परिसरात काही काळ तणावाचे वातावरण निर्माण झाले होते.