संघर्ष गांगुर्डे, साम टिव्ही

कल्याणमधून धक्कादायक बातमी समोर येत आहे. लग्नाचं आमिष दाखवून २९ वर्षीय तरूणीवर बलात्काराची घटना उघडकीस आली आहे. आरोपी हा प्रियकर असून, त्यानं प्रेयसीचा मोबाईल हॅक करून तिच्यावर पाळत ठेवण्याचा प्रयत्न केला. तसेच तिचे काही अश्लील व्हिडिओ तयार केले. या व्हिडिओद्वारे आरोपीनं तरूणीला ब्लॅकमेल केलं. आरोपीवर गुन्हा दाखल करण्यात आला असून, सध्या पोलिसांकडून फरार आरोपीचा शोध सुरू आहे.

कल्याण पश्चिममध्ये हा सर्व प्रकार घडला. २९ वर्षीय तरूणीचे राजकीय पक्षाशी संबंधित तरूणासोबत प्रेमसंबंध होते. मात्र, काही काळानंतर दोघांमध्ये खटके उडाले होते. दोघांमध्ये मतभेद सुरू होते. प्रेयसीवर प्रियकर कायम संशय घेत होता. आरोपी तरूणानं प्रेयसीवर बलात्कार केला. नंतर तिच्या वैयक्तिक आयुष्यात लक्ष ठेवण्याचा प्रयत्न केला.

आरोपी तरूणानं प्रेयसीचा मोबाईल हॅक केला. तसेच तिच्यावर पाळत ठेवली. यासह तिचे अश्लील व्हिडिओ बनवले. एवढंच नाही तर तरुणीच्या कुटुंबीयांनाही धमक्या देत ब्लॅकमेल केलं. अखेर हे प्रकरण पोलिसांपर्यंत गेलं. पोलिसांनी तपासाला सुरूवात केली. पोलीस तपासात आरोपी तरूणाच्या मोबाईलमध्ये अश्लील व्हिडिओ सापडले.

तेव्हा हे संपूर्ण प्रकरण उघडकीस आलं. विनीत गायकर असे आरोपी प्रियकराचे नाव असून, कल्याण खडकपाडा पोलिस ठाण्यात त्याच्या विरोधात गंभीर कलमांखाली गुन्हा दाखल करण्यात आला आहे. मिळालेल्या माहितीनुसार, आरोपी हा राजकीय पक्षाचा पदाधिकारी असल्याची माहिती आहे. पोलिसांवर दबाव असून तो अजूनही फरार आहे. पोलिसांचा शोध सुरू आहे.