कल्याणमध्ये दिवसेंदिवस गुन्हेगारी घटनांमध्ये वाढ होत असल्याचं चित्र आहे. अशातच कल्याण पश्चिममधून एक धक्कादायक घटना समोर येत आहे. लेडीज सर्व्हिस बारवर सुरू असलेल्या गैरप्रकारांवर पोलिसांनी आणखी एक मोठी कारवाई केली आहे. परिमंडळ ३ चे पोलिस उपायुक्त अतुल झेंडे यांच्या मार्गदर्शनाखालील विशेष पथकाने महात्मा फुले चौक परिसरातील ताल बारवर मध्यरात्री धडक कारवाई केली.

कल्याण पश्चिम येथील लेडीज सर्व्हिस बारवर गैरप्रकार सुरू असल्याचं कळताच पोलिसांनी छापा टाकला. बारमध्ये आक्षेपार्ह नृत्य, तोडक्या कपड्यातील बारबाला, कानठळ्या बसवणारा डीजे आणि पहाटेपर्यंत सुरू असलेला व्यवसाय अशा अनेक नियमभंगाच्या तक्रारींवरून हा छापा टाकण्यात आला.

तपासात नियमांचे सर्रास उल्लंघन झाल्याचे स्पष्ट झाल्यानंतर पोलिसांनी १५ बारबाला सहित एकूण २८ जणांवर गुन्हा दाखल केला आहे. यापैकी बारचे मालक, चालक, मॅनेजरसह एकूण ६ जणांना पोलिसांनी ताब्यात घेतले आहे. अचानक धाड पडताच बारमधील वातावरण एकदम शांत झाले असून, मद्यपींची झिंगही उतरली. या कारवाईमुळे कल्याण-डोंबिवली परिसरात पुन्हा एकदा डान्सबारवरील पोलिस अॅक्शनची मोठी चर्चा रंगली आहे.

पोलिसांकडून अशा प्रकारच्या बेकायदेशीर कृत्यांवर पुढील काळातही कठोर कारवाई सुरूच राहणार असल्याचे संकेत दिले जात आहेत.