संघर्ष गांगुर्डे साम टीव्ही

कल्याण–डोंबिवलीत ठाकरे गटाचे चार नगरसेवक बेपत्ता असल्याच्या प्रकरणात आता आरोप-प्रत्यारोप सुरू झाले आहेत. नगरसेवक मधुर म्हात्रे यांच्या वडिलांनी पोस्टर लावून बदनामी केल्याची तक्रार केल्यानंतर ठाकरे गटातील पदाधिकाऱ्यांनी या आरोपांना जोरदार प्रत्युत्तर दिलं आहे. ठाकरे गटाचे पदाधिकारी नीरज दुबे यांनी ही प्रतिक्रिया दिली आहे.

मधुर म्हात्रे यांच्या वडिलांनी पोस्टर लावल्याप्रकरणी ठाकरे गटाच्या पदाधिकाऱ्यांवर बदनामीची तक्रार दाखल केली आहे. या तक्रारीनंतर ठाकरे गटाचे पदाधिकारी नीरज दुबे यांनी आरोप फेटाळून लावत माध्यमांना माहिती दिली आहे. मधुर म्हात्रे यांच्या वडिलांनी दिलेली माहिती खोटी आहे.

'आम्ही स्वतः त्यांच्या घरी जाऊन वडील आणि कुटुंबीयांशी संपर्क साधल्याचा दावा त्यांनी केला. त्यावेळी मधुर आमच्या संपर्कात नाही. संपर्क झाला तर आम्ही तुम्हाला सांगू, असं वडिलांनी सांगितल्याचं दुबे म्हणाले.

आजपर्यंत ना नगरसेवकाचा ना त्यांच्या वडिलांचा कुठलाही संपर्क पक्षाशी झालेला नाही, त्यामुळे आम्हाला त्यांच्या सुरक्षिततेची चिंता आहे.सत्ता स्थापन होईपर्यंत नगरसेवकांना डांबून ठेवले असण्याची किंवा अपहरणाची शक्यता नाकारता येत नाही, म्हणून आम्ही पोलिसांकडे तक्रार व पोस्टर लावल्याचं त्यांनी स्पष्ट केलं. नगरसेवकांची बदनामी करण्याचा कुठलाही हेतू नसून त्यांच्या हितासाठीच हा पाठपुरावा करण्यात आल्याचं ठाकरे गटाने सांगितलं आहे.

नगरसेवकाच्या वडिलांनी कोणाविरोधात तक्रार केली?

नगरसेवक मधुर म्हात्रे यांच्या वडिलांनी कोळसेवाडी पोलीस ठाण्यात ठाकरे गटाच्या पदाधिकाऱ्यांच्या विरोधात अदखलपात्र तक्रार दाखल केली. आमचा मुलगा आमच्या संपर्कात असून तो देवदर्शनासाठी गेलाय. त्याचे बेपत्ता असल्याचे पोस्टर लावून बदनामी करत आहे, असा आरोप वडिलांनी केला आहे. ठाकरे गटाच्या युवा सेना अधिकारी नीरज कुमार आणि त्याच्यासोबत असलेले दोन ते तीन पदाधिकाऱ्यांविरोधात अदखलपात्र गुन्हा दाखल करण्यात आला. खासदार संजय राऊत यांच्या इशाऱ्यानंतर ठाकरे गटाकडून बेपत्ता पोस्टर कल्याण पूर्वेत लावण्यात आले होते. त्या पोस्टर विरोधातच मधुर म्हात्रे यांच्या वडिलांनी पोलिसांकडे अधिकृत तक्रार दाखल केली.