संघर्ष गांगुर्डे,साम टीव्ही

कल्याणच्या मोहने परिसरात रीलस्टार प्रेम भाटी याचा दुचाकी अपघातात झालेल्या मृत्यू प्रकरणी खडकपाडा पोलिसांनी महत्त्वाची कारवाई केली आहे. रस्त्याच्या कामादरम्यान सुरक्षिततेच्या उपाययोजना न करता निष्काळजीपणा केल्यामुळे हा अपघात झाल्याचे प्राथमिक तपासात समोर आल्यानंतर संबंधित तीन ठेकेदारांविरोधात गुन्हा दाखल करण्यात आला आहे.

प्रेम भाटी हा दुचाकीवरून जात असताना रस्त्यावर टाकण्यात आलेल्या खडीवरून वाहन घसरल्याने त्याचा गंभीर अपघात झाला होता. या अपघातात त्याचा मृत्यू झाला. घटनेनंतर पोलिसांनी सखोल तपास सुरू केला होता.

तपासादरम्यान संबंधित रस्त्याचे काम सुरू असताना ठिकाणी कोणतेही इशारा फलक, बॅरिकेड्स अथवा अन्य सुरक्षिततेच्या उपाययोजना करण्यात आल्या नव्हत्या. तसेच रस्त्यावर खडी टाकून तीचे व्यवस्थित व्यवस्थापन करण्यात आले नसल्याचेही समोर आले. त्यामुळे वाहनचालकांच्या सुरक्षिततेकडे दुर्लक्ष झाल्याचा ठपका ठेकेदारांवर ठेवण्यात आला आहे.

या प्रकरणी खडकपाडा पोलिसांनी रस्त्याचे काम करणारे ठेकेदार निकी मोटवाणी,महेश भोईर आणि गणेश पाटील यांच्याविरोधात गुन्हा दाखल केला असून, त्यांच्या निष्काळजीपणामुळे प्रेम भाटी यांच्या मृत्यूस कारणीभूत ठरल्याचा आरोप करण्यात आला आहे. या घटनेमुळे रस्ते कामांदरम्यान सुरक्षिततेच्या नियमांचे पालन कितपत केले जाते, याबाबत पुन्हा एकदा प्रश्नचिन्ह निर्माण झाले आहे. खडकपाडा पोलीस या प्रकरणाचा अधिक तपास करत आहेत.

तत्पूर्वी, प्रेम भाटीचा सीसीटीव्ही फुटेज काल पोलिसांच्या हाती लागले. या सीसीटीव्ही फुटेजमध्ये प्रेमचा रात्री उशिरा दुचाकी चालवताना रस्त्यावरील खडीमुळे अपघात झाल्याचे दिसत आहे. सीसीटीव्ही व्हिडिओ हाती लागल्यानंतर पोलिसांनी तपासाला सुरूवात केली होती. त्यानंतर आज मंगळवारी पोलिसांनी तीन ठेकेदारांविरोधात गुन्हा दाखल केला आहे.