डॉक्टर हे देवाचे दुसरे रुप असतात असं म्हणतात. अनेकांचे प्राण वाचवण्यासाठी ते सतत प्रयत्न करत असतात. कधीही आपल्या कर्तव्यासाठी तत्पर असतात. त्यांच्या प्रयत्नांमुळे कितीतरी नागरिकांना जीवनदान मिळते. आज जागतिक डॉक्टर दिन साजरा केला जात आहे. याच दिवशी

माणुसकीचं, डॉक्टरी सेवेचं असं जिवंत उदाहरण पुणे जिल्ह्यात पाहायला मिळालं.जुन्नर तालुक्यातील नारायणगाव येथील डॉ. सदानंद राऊत आणि डॉ. पल्लवी राऊत या डॉक्टर दांपत्याने मृत्यूच्या दारात असलेल्या एका शेतकऱ्याला जीवदान दिलंय. त्यांच्या प्रयत्नांमुळे आज एका शेतकऱ्याचा जीव वाचला आहे. त्याला पुन्हा एकदा जीवनदान मिळालं आहे.

शिरूर तालुक्यातील कवठे येमाई गावातील एका शेतकऱ्याला शेतात काम करताना विषारी कोब्रा सर्पाने दंश केला. त्या व्यक्तीला रुग्णालयात आणेपर्यंत त्याचे हृदयाचे ठोके थांबले होते, श्वासही बंद झाला होता. मात्र, राऊत दाम्पत्याने तातडीने उपचार केले. त्यांच्या उपचारामुळे शेतकरी बरा झाला आहे.

फक्त एवढंच नाही, तर गेल्या अनेक वर्षांपासून राऊत दांपत्य सर्पदंश झालेल्या हजारो रुग्णांचे प्राण वाचवत आहेत. आतापर्यंत १०,००० हून अधिक सर्पदंश रुग्णांना त्यांनी जीवदान दिलं आहे. आजच्या जागतिक डॉक्टर दिनानिमित्त हे डॉक्टर म्हणजे खरेच देवदूत वाटतात...!

डॉक्टर दिन (Inernational Doctor Day)

आज जागतिक डॉक्टर दिन साजरा केला जात आहे. डॉक्टर दिन हा दिवस डॉक्टरांच्या सन्मानासाठी साजरा केला जातो. डॉक्टरांनी समाजासाठी दिलेल्या योगदानाचा सन्मान करणे आणि त्यांची कबुली देणे हा या दिवसाचा उद्देश असतो. त्यांनी समाजाप्रती केलेल्या कामाचं कौतुक करण्याचा हा आजचा दिवस आहे