सचिन जाधव, साम टीव्ही

राज्याच्या मराठवाडा आणि पश्चिम महाराष्ट्रात पावसाने हाहाकार उडाला आहे. पुराने शेतकऱ्यांच्या हातातोंडाशी आलेला घासून हिरावून घेतला आहे. या पावसाने शेतकऱ्यांचे संसार उघड्यावर आलेत. तर मागील ४ दिवसांत ८ जणांचा मृत्यू झाला आहे. पावसाचा १५० हून अधिक गावांना फटका बसला आहे. मात्र, मराठवाड्यातील शेतकऱ्यांचं संकट संपेना झाला आहे. हवामान विभागाने मराठवाड्याला पुन्हा एकदा पावसाचा इशारा दिला आहे.

पुण्यातील हवामान तज्ज्ञ एस डी सानप यांनी मराठवाड्याला पुन्हा एकदा पावसाचा इशारा दिला आहे. सानप यांनी सांगितलं की, 'राज्यासाठी येत्या दोन दिवसांत म्हणजे आज आणि उद्या येलो अलर्ट आहे. राज्यात २७ सप्टेंबरनंतर पावसाचा जोर वाढणार आहे. आता मराठवाड्यासाठी ऑरेंज अलर्ट जारी करण्यात आला आहे. तर कोकणपट्टी, मध्य महाराष्ट्र घाटमाथ्यावरही ऑरेंज अलर्ट जारी करण्यात आला आहे'.

'२७,२८,२९ सप्टेंबर या काळात ऑरेंज अलर्ट जारी करण्यात आला आहे. 29,30 सप्टेंबरनंतर पाऊस कमी होणार आहे. विदर्भातील काही भागात दोन दिवस येलो अलर्ट आहे. कमी दाबाचे क्षेत्र बंगालच्या उपसागरात कमी झाल्यामुळे पश्चिमेकडे त्याची हालचाल होती. ला नीना आहे की नाही अजून जाहीर केलं नाही, आता तटस्थ परिस्थिती आहे. येणाऱ्या ऑक्टोबर,नोव्हेंबर, डिसेंबर महिन्यात ला निना निर्माण होण्याची शक्यता ७४ टक्के आहे. आम्ही त्याच्यावर लक्ष ठेवून आहोत, असेही सानप यांनी सांगितलं.

'थंडीचा अंदाज हा सप्टेंबर महिन्याच्या शेवटी दिला जाईल. जास्त पाऊस झाला तर थंडी जास्त होईल, असा काही संबंध नाही. हे बदल होत असतात दरवर्षी ला निना बदलला तर तसं होऊ शकतं. पुढच्या महिन्याच्या अखेर आपल्याला ला नीना बाबत कळेल. ला नीना चांगला असला की हिवाळा चांगला असतो असं बोललं जातं. ला निना निर्माण व्हायला ऑक्टोबर महिन्याची शेवट वाट बघायला लागेल. आता यावर बोलणे योग्य नाही. येणाऱ्या पाच-सहा दिवस महाराष्ट्रातील बहुतांश ठिकाणी पाऊस पडू शकतो, अशी शक्यता व्यक्त करण्यात आली आहे.