मुंबई : नालासोपारा परिसरात एका धक्कादायक घटनेमुळं खळबळ माजली आहे. एका विवाहीत तरुणीवर तिच्या पतीने आणि प्रियकराने अॅसिड हल्ला केला. तरुणीच्या अंगावार अॅसिड फेकल्यानं तिचा चेहरा आणि हात भाजला असून तिला उपचारासाठी खासगी रुग्णालयात दाखल करण्यात आले आहे. याप्रकरणी गुन्हा दाखल झाला असून पेल्हार पोलीस आरोपींचा शोध घेत आहेत. (Acid attack on woman in nalasopara)

नेमकं काय घडलं?

ही पीडित तरुणी नालासोपारा वाकणपाडा येथील असून घाटकोपर येथे राहणाऱ्या तौफीक नावाच्या व्यक्तीसोबत तिचा विवाह झाला होता. पंरुतु, तौफिक तिला मारहाण करत असल्याने त्या तरुणीनं त्याच्यासोबत असलेलं नातं तोडलं होतं. त्यानंतर ही तरुणी कामरान सोबत लिव्ह इन रिलेशनशीप मध्ये राहत होती. पण कामराने लग्नाला नकार दिल्याने तिनं त्याच्यासोबतही नातं तोडलं.

त्यानंतर सदर तरुणी नालासोपाऱ्यातील कमाल या व्यक्तीसोबत राहत होती. परंतु, याबाबत तौफिक आणि कामरानला कळल्यानंतर त्यांनी तिच्यासोबत भांडण केलं. पण त्या तरुणीनं दोघांनाही नापसंती दाखवून कमाल बरोबर राहण्याचं ठरवलं. त्यानंतर रागाच्या भरात दोघांनी कट रचून सोमवारी रात्री दोन वाजताच्या सुमारास तरुणीवर अॅसिड हल्ला केला.

त्यानंतर त्या दोघांनी पळ काढला. अॅसिड हल्ल्यात तरुणीसह कमालही जखमी झाला आहे. या दोघांवर रुग्णालयात उपचार सुरु आहेत. या प्रकरणी गुन्हा दाखल झाला असून पोलीस आरोपींचा शोध घेत आहेत, अशी माहिती सहाय्यक पोलीस निरीक्षक सोपान पाटील यांनी दिली आहे.