दिलीप कांबळे

Pune News : सलग तीन सुट्ट्यांमुळे मुंबईहून अनेकजण मुंबई-पुणे एक्स्प्रेस वेवरुन गावी किंवा फिरायला निघाले आहे. मात्र प्रवाशांना एक्स्प्रेस वेवर मोठ्या वाहतूक कोंडीचा सामना करावा लागत आहे. वाहनांच्या लांबच लांब रांगा मुंबई-पुणे एक्स्प्रेस वेवर दिसत आहे. कालपासून कायम असलेल्या या वाहतूक कोंडीमुळे प्रवाशांना अनेक अडचणींचा सामना करावा लागत आहे.

मुंबई-पुणे एक्सप्रेस वेवर वाहतूक कोंडी झाल्याने खंडाळा घाट परिसरात वाहतुकीचा वेग मंदावला आहे. शनिवार, रविवार आणि सोमवार अशा सलग तीन दिवस सुट्ट्या आल्यामुळे पर्यटक मोठ्या संख्येने खाजगी वाहनांमधून पर्यटनासाठी घराबाहेर पडल्याने काल सकाळपासून मुंबई-पुणे एक्सप्रेस वेवर ट्रॅफिक जाम झाला आहे.

सदरची वाहतूक कोंडी सोडवण्यासाठी खंडाळा बोगदा परिसरात महामार्ग पोलिसांनी 10-10 मिनिटांचे ब्लॉक घेत आहेत. मुंबईच्या दिशेने जाणारी वाहने थांबवत मुंबईहून पुण्याकडे जाणारी वाहने सर्व सहा लेन वरून सोडली जात आहेत. यामुळे पुणे मुंबई लेनवर देखील वाहतूक कोंडी होत आहे.

तर मुंबई पुणे लेनवर खालापूर टोलनाक्यापासून खंडाळ्यापर्यंत प्रवासी वाहनांच्या रांगा पाहायला मिळत आहेत. या वाहतूक कोंडीत सापडल्याने वाहन चालकांचे व वाहनांमधील प्रवाशांचे मोठ्या प्रमाणात हाल होत आहेत. या वाहतूक कोंडीत अडकलेले वाहनचालक त्रस्त झाले आहेत. वाहन चालकांनी याबाबत संतप्त प्रतिक्रिया दिल्या आहेत.