सचिन जाधव, पुणे

पुणे जिल्ह्यातील भोर तालुक्यात जुलै महिन्याच्या सुरुवातीला झालेल्या अतिवृष्टीचा भातशेतीला मोठा फटका बसला आहे. मुसळधार पावसामुळे तालुक्यातील ४४३ शेतकऱ्यांच्या १२३.३८ हेक्टर क्षेत्रातील भात रोपांचे, तर १ हजार ४३६ शेतकऱ्यांच्या २७८.२७ हेक्टर शेतजमिनीचे नुकसान झाले आहे. या नुकसानीपोटी तब्बल १ कोटी ३३ लाख ६३ हजार रुपयांच्या नुकसानभरपाईचा प्रस्ताव कृषी विभागाने पंचनामे करून जिल्हाधिकारी कार्यालयाकडे पाठविला आहे.

तालुक्यातील वेळवंड, भूतोंडे, हिडोशी आणि महुढे खोऱ्यात १ ते ८ जुलैदरम्यान झालेल्या मुसळधार पावसामुळे भातशेतीचे मोठे नुकसान झाले. अनेक ठिकाणी शेतातील ताली फुटून पाणी वाहून गेले. त्यामुळे शेतांमध्ये माती, दगड आणि गोटे साचले आहेत. काही भागांत तर पाण्याच्या जोरदार प्रवाहामुळे शेतातील सुपीक मातीच खरडून गेल्याने जमीन शेतीसाठी बाधित झाली आहे.

अतिवृष्टीमुळे भात रोपांचे नुकसान झाल्याने शेतकऱ्यांना दुबार लागवडीचा खर्च सहन करावा लागण्याची शक्यता आहे. आधीच शेतीच्या वाढत्या खर्चामुळे आर्थिक अडचणीत असलेल्या शेतकऱ्यांसमोर आता आणखी मोठे संकट उभे राहिले आहे.

दरम्यान, कृषी विभागाने आपत्तीग्रस्त भागाची प्रत्यक्ष पाहणी करून नुकसानीचे पंचनामे पूर्ण केले आहेत. त्यानंतर नुकसानभरपाईचा प्रस्ताव जिल्हाधिकारी कार्यालयाकडे सादर करण्यात आला आहे. नुकसानभरपाईची रक्कम लवकर मंजूर करून ती शेतकऱ्यांच्या खात्यावर जमा करावी, अशी मागणी नुकसानग्रस्त शेतकऱ्यांकडून होत आहे.