अक्षय बडवे, साम टीव्ही

मुंबई : राज्यातील विविध भागात मुसळधार पाऊस कोसळत आहे. राज्यातील काही भागात पूरस्थिती निर्माण झाली आहे. या मुसळधार पावसाने पुणेकरांनाही चांगलंच झोडपून काढलं आहे. गेल्या काही दिवासांपासून ब्रेक लागलेल्या पावसाला पुन्हा एकदा सुरुवात झाली आहे. हवामान विभागाने राज्यातील विविध जिल्ह्यात पुढील ३ तासांत मुसळधार पावसाची शक्यता व्यक्त केली आहे.

हवामाना विभागाने पुढील ३ तासांत अहिल्यानगर, छत्रपती संभाजीनगर, जालना, नाशिक, पुणे या जिल्ह्यात मुसळधार पावसाची शक्यता व्यक्त केली आहे. पुणे जिल्ह्यासाठी ऑरेंज अलर्ट जारी करण्यात आला आहे. तर काही ठिकाणी ४०-६० किमी प्रतितास वेगाने वादळासह मध्यम स्वरूपाचा पाऊस पडण्याची शक्यता व्यक्त करण्यात आली आहे. पुणे जिल्हा प्रशासनाकडून माहिती जाहीर करण्यात आली आहे.

पुणे जिल्हा प्रशासनाने पुढील ३ तास पुण्यात जोरदार पावसाची शक्यता व्यक्त केली. त्यानंतर काही वेळातच पुण्यात सर्वदूर जोरदार पावसांच्या सरी कोसळू लागल्या आहेत. या पावसाने पुण्यात रस्त्यावरही पाणी साचायला सुरुवात झाली आहे. दुसरीकडे मंत्रालयानेही राज्यातील नागरिकांना सतर्क केलं आहे. पुढील २४ तासांत कोल्हापूर, पुणे, रायगड, सांगली, सातारा, ठाणे येथे तुरळक ठिकाणी मुसळधार पाऊस पडण्याची शक्यता व्यक्त केली आहे.

सांगलीतील तासगावच्या कापूर ओढ्याला पूर

सांगली जिल्ह्यात गेल्या दोन दिवसांपासून मुसळधार पाऊश कोसळत आहे. सांगलीच्या तासगाव तालुक्यात मुसळधार पाऊस कोसळला. यामुळे तासगाव शहरातील कापूर ओढा भरून वाहू लागला. या पावसामुळे कापूर ओढ्यात पूर परिस्थिती निर्माण झाल्याचे चित्र पाहायला मिळत आहे. गेल्या दोन दिवसांपासून सांगली जिल्ह्यामध्ये पावसाची पुन्हा दमदार हजेरी पाहायला मिळाली. मुसळधार पावसामुळे अनेक ठिकाणी ओढे नाले तुडुंब भरून वाहू लागले आहेत.