आता मुंबई पूर्णपणे जोडली जाणार आहे. गोरेगाववरुन थेट मुंलुंड गाठता येणार आहे. गोरेगाव-मुलुंड जोड मार्गाचे काम सुरु झाले आहे. गोरेगाव मुलुंड लिंक रोड हा वर्सोवा-दहिसर कोस्टल रोडलाही जोडला जाणार आहे. त्यामुळे मुंबईकरांना खूप फायदा होणार आहे. यामुळे मुंबई, पश्चिम उपनगरांसह ठाणे परिसरातील वाहतूक कोंडी फुटणार आहे. यामुळे नागरिकांचा प्रवास अधिक वेगवान होणार आहे.

गोरेगाव मुलुंड लिंक रोड प्रकल्पातील जुळ्या बोगद्याच्या कामासाठी TBM (बोगदा खनन मशीन) चे सुटे भाग शाफ्टमध्ये उतरवण्यास सुरुवात झाली आहे. हे काम नियोजित वेळेपेक्षा ३ महिने आधीच सुरु झाले आहे. यामुळे प्रकल्पाच्या कामाला गती मिळाली आहे. भविष्यातदेखील हे काम खूप वेगवान पद्धतीने होण्याची अपेक्षा आहे. या कामाची महानगरपालिका आयुक्त भूषण गगराणी यांनी कामाची प्रत्यक्ष पाहणी केली आहे.

दोन जुळे बोगदे

गोरेगाव-मुलुंड लिंक रोड हा १२.२० किमी लांब असणार आहे. त्यात ४.७० किमीचे जुळे भूमिगत बोगदे असणार आहे. हे बोगदे १४.२० मीटर रुंद असणार आहे. तर संजय गांधी राष्ट्रीय उद्यान परिसरात १३ मीटरचा भाग असणार आहे.

मुंबईतील सर्वात मोठी १४.४९ मीटर व्यासाची TBM मशीन प्रकल्पात वापरणार आहे. TBM चे वजन प्रत्येकी २१७५ मेट्रिक टन आहे. टेराटेक कंपनीची ही मशीन आहे. या मशीनमुळे काम सोपे आणि जलद होणार आहे. यामुळे दादासाहेब फाळके चित्रनगरी येथे २०० मीटर लांब, ५० मीटर रुंद व ३० मीटर खोल लॉन्चिंग शाफ्ट तयार केले जाणार आहे.

८०० मेट्रिक टन आणि ३५० मेट्रिक टन क्षमतेच्या क्रेनद्वारे TBM चे भाग शाफ्टमध्ये उतरवले जात आहेत.१३५ मेट्रिक टन वजनाचा मुख्य शिल्ड भाग यशस्वीपणे उतरवला आहे. बोगद्यात वायुवीजन, अग्निसुरक्षा आणि पर्जन्यजल मॅनेजमेंट यंत्रणा बसवली आहे. या बोगद्याचे काम पूर्ण झाल्यानंतर टीबीएम मशीन मुलुंडच्या अमर नगर येथून बाहेर काढण्यात येणार आहे.