Gautam Gaikwad Sinhgad Pune : पुण्यातील सिंहगड किल्ल्यावर बेपत्ता झालेला गौतम गायकवाड हा तरुण काल (२५ ऑगस्ट) सापडला. सिंहगडाच्या तानाजी कडा येथील हवा पॉइंटजवळ गेल्यानंतर तो बेपत्ता झाला होता. पाच दिवसांपासून बेपत्ता होता. गडावरील स्थानिक नागरिकांनी गौतम सापडल्याची माहिती दिली. त्यानंतर गौतमला उपचारांसाठी रुग्णालयात दाखल करण्यात आले.

गौतम गायकवाड प्रकरणात महत्त्वाची माहिती समोर आली होती. गौतमवर तब्बल २० लाख रुपयांपेक्षा जास्त कर्ज होते. त्याला वारंवार वसुलीसाठी धमकीचे फोन येते होते. त्यामुळे गौतम बेपत्ता झाल्यानंतर त्याचा खरंच अपघात झाला की घातपात झाला असा प्रश्न पोलिसांसमोर होता. याशिवाय गौतमने स्वत:च्या मृत्यूचा बनाव रचला नाही ना? असाही संशय व्यक्त करण्यात आला होता.

रविवारी (२५ ऑगस्ट) संध्याकाळी तानाजी मालुसरे कड्यावरुन खाली पडलेला गौतम गायकवाड शंभर तासानंतर सापडला. गौतमवर पुण्यातील खासगी रुग्णालयामध्ये उपचार सुरु आहेत. १०० तास गौतमने जंगलात कसा राहिला याची हकीकत गौतमने त्याच्या आईला सांगितली. गौतमच्या आईवडिलांनी ही माहिती माध्यमांशी संवाद साधताना सांगितली.

२० ऑगस्ट रोजी गौतम हैदराबादहून त्याच्या मित्रांसह पुण्यातील सिंहगडावर गेला. एक कुत्रा किल्ल्यावरुन खाली पडत असल्याचे गौतमने पाहिले. त्याला वाचवताना गौतम आणि कुत्रा दोघेही दरीत पडले. गौतम जंगलामध्ये चार दिवस फिरत राहिला. त्याला परतण्याचा रस्ता सापडला नाही. अन्नपाण्याशिवाय ४ दिवस त्याने जंगलामध्ये काढले. त्याला किडे चावत होते. मध्येच चक्कर ये होती. ३ दिवसानंतर तो शुद्धीवर आला. शुद्धीवर आल्यानंतर तो गड चढत वर आला. स्थानिकांनी त्याला पाहिले आणि त्याचा जीव वाचला, अशी माहिती गौतमच्या आईने दिली आहे.