Maharashtra Politics : मनसेला मोठं खिंडार, एकनाथ शिंदेंचा राज ठाकरेंना जोरदार धक्का

विकास काटे, साम टीव्ही, प्रतिनिधी

Maharashtra : स्थानिक स्वराज्य संस्थांच्या निवडणुकांच्या पार्श्वभूमीवर मोर्चेबांधणी सुरु असताना मनसेला मोठा धक्का बसला आहे. कल्याण-डोबिंवलीमध्ये महाराष्ट्र नवनिर्माण सेनेला गळती लागली आहे. माजी नगरसेविकांसह अनेक पदाधिकारी, कार्यकर्त्यांनी उपमुख्यमंत्री एकनाथ शिंदे यांच्या शिवसेना शिंदे गटात प्रवेश करण्याचा निर्णय घेतला आहे.

मनसेचे माजी नगरसेवक राजन मराठे, माजी नगरसेविका ज्योती मराठे, विद्यार्थी सेनेचे सूरज मराठे, मनसेचे उपशहर प्रमुख किशोर कोशिंबकर, विभाग सचिव संजय तावडे, उपविभाग प्रमुख केतन खानविलकर, शाखाध्यक्ष सुधीर थोरात यांच्यासह मनसेच्या अनेक कार्यकर्ते शिवसेना शिंदे गटात प्रवेश करणार आहेत.

उपमुख्यमंत्री एकनाथ शिंदे यांच्या उपस्थितीमध्ये ठाणे येथील बंगल्यावर पदाधिकारी, कार्यकर्ते दाखल झाले. मनसेच्या कल्याण-डोबिंवलीमधील पदाधिकाऱ्यांनी शिंदे गटात प्रवेश केल्याने मनसेला खिंडार पडल्याचे पाहायला मिळत आहे. मनसे व्यतिरिक्त ठाणे महानगर पालिकेतील राष्ट्रवादी काँग्रेसचे माजी नगरसेवक व टीडीसी बँकेचे माजी संचालक बाबाजी पाटील यांनी देखील शिंदे गटात प्रवेश करणार आहेत.

कोकणातही मनसेला धक्का

मनसेला कोकणातही धक्का बसणार असल्याचे म्हटले जात आहे. मनसेचे कोकण संघटक वैभव खेडेकर भारतीय जनता पक्षात जाणार असल्याच्या चर्चा सुरु आहे. त्यांना सुरुवातीला शिवसेना शिंदे गटामध्ये जाण्याची ऑफर मिळाली होती. आता वैभव खेडेकर शिंदे गटामध्ये जाणार असल्याच्या चर्चा रंगल्या आहेत. निवडणुकीपूर्वी मनसेला लागोपाठ धक्के बसत असल्याचे म्हटले जात आहे.