EPFO खाते असणाऱ्यांच्या कुटुंबीयांना १५ लाख रुपये मिळणार? पण कसे? जाणून घ्या...

EPFO : कर्मचारी भविष्य निर्वाह निधी संघटना म्हणजेच EPFO कडून नोकरी करणाऱ्यांचे PF खाते सुरु केले जाते. त्यानंतर दरमहा कर्मचाऱ्यांच्या पगारातून ठराविक रक्कम कापली जाते आणि PF खात्यात जमी होते. त्याच वेळी कंपनी कर्मचाऱ्यांच्या PF खात्यातही तीच रक्कम जमा करते. EPFO यावर वार्षिक व्याज देखील देते. या EPFO खातेधारकांच्या कुटुंबीयांना १५ लाख रुपये मिळणार असल्याची माहिती समोर आली आहे.

१५ लाख रुपये कशासाठी मिळतील?

कर्मचारी भविष्य निर्वाह निधी संघटनेने म्हणजेच EPFO ने मृत्यू मदत निधी/ मृत्यू लाभ योजना या अंतर्गत दिलेली एक्स-ग्रेशिया रक्कम वाढवली आहे. रक्कम १५ लाख रुपयांपर्यंत वाढवण्यात आली आहे. पूर्वी ही एक्स-ग्रेशिया रक्कम ८.८ लाख रुपये होती. ही नवीन रक्कम १ एप्रिल २०२५ पासून लागू केली जाणार आहे. ही रक्कम सेवेदरम्यान मृत्युमुखी पडणाऱ्या कर्मचाऱ्यांच्या नोंदणीकृत व्यक्तीला दिली जाईल.

१५ लाख रुपये कोणाला मिळतील?

योजनेअंतर्गत, कर्मचाऱ्यांना त्यांचे कायदेशीर वारसदार नेमणे आवश्यक असते. कामादरम्यान किंवा सेवेदरम्यान ज्या कर्मचाऱ्याचा मृत्यू होईल. त्या कर्मचाऱ्याच्या कुटुंबाला, कायदेशीर वारसाला किंवा नोंदणीकृत व्यक्तीला ही १५ लाख रुपयांची रक्कम दिली जाईल.

१५ लाख रुपये कुठून येतील आणि हा निर्णय का घेण्यात आला?

१५ लाख रुपये हे रेशन कर्मचारी कल्याण निधीतून दिले जातील. १ एप्रिल २०२६ पासून ही रक्कम दरवर्षी ५ टक्क्यांनी वाढेल असे EPFO ने म्हटले आहे. महागाई आणि वाढत्या खर्चामुळे पीडित कुटुंबाला आर्थिक मदत व्हावी यासाठी हा निर्णय केंद्रीय विश्वस्त मंडळाने घेतला आहे. या मंडळात सरकार, नियोक्ते आणि कर्मचारी संघटनांचे प्रतिनिधी असतात.