BJP Leader Narendra Pawar Resigns From All Party Posts : कल्याण पश्चिम मतदारसंघातील भाजपचे माजी आमदार आणि भटके विमुक्त आघाडीचे महाराष्ट्र प्रदेशाध्यक्ष नरेंद्र पवार यांनी पक्षातील सर्व पदांचा तडकाफडकी राजीनामा दिला आहे. त्यांनी आपला राजीनामा भाजपचे प्रदेशाध्यक्ष रवींद्र चव्हाण यांच्याकडे सुपूर्द केला आहे. एका महिलेने नरेंद्र पवार यांच्यावर बलात्कार आरोप केल्यानंतर ठाण्यात खळबळ उडाली होती. या कारणामुळेच नरेंद्र पवार यांनी राजीनामा दिला.

आपल्या राजीनामा पत्रात नरेंद्र पवार यांनी गंभीर आरोप केले आहेत. आपल्या विरोधात मोठे षडयंत्र रचून खोटे गुन्हे दाखल करण्यात आले आहेत आणि आपली बदनामी केली जात असल्याचे म्हटले आहे. या प्रकरणांमुळे किंवा निर्माण झालेल्या वादांमुळे पक्षाची प्रतिमा डागाळू नये, यासाठी आपण स्वतःहून पक्षातील सर्व पदांचा राजीनामा देत असल्याचे पत्रात नमूद केले आहे.

माजी आमदार नरेंद्र पवार यांनी घेतलेल्या या तडकाफडकी निर्णयामुळे कल्याण-डोंबिवलीतील राजकीय वर्तुळात खळबळ उडाली आहे. सूत्रांकडून मिळालेल्या माहितीनुसार, भाजप प्रदेशाध्यक्ष रवींद्र चव्हाण यांनी राजीनामा स्वीकारला आहे.

माजी आमदार नरेंद्र पवार आणि साथीदारावर बलात्काराचा गुन्हा दाखल

ठाणे ग्रामीण पोलिसांच्या हद्दीतील पडघा पोलीस ठाण्यात माजी आमदार नरेंद्र पवार आणि त्यांचा साथीदार शैलेश पाटील यांच्याविरोधात गंभीर स्वरूपाचा गुन्हा दाखल करण्यात आला. एका महिलेला फार्महाऊसवर नेऊन पिस्तूल दाखवत तिच्यावर सामूहिक बलात्कार (Gangrape) केल्याचा आणि व्हिडिओ काढून धमकी दिल्याचा गंभीर आरोप करण्यात आला आहे.