BKC Eastern Highway Missing Link: वांद्रे-कुर्ला संकुल म्हणजेच बीकेसी (BKC) हे मुंबईतील महत्त्वपूर्ण औद्योगिक केंद्र मानले जाते. गेल्या काही वर्षांमध्ये या केंद्र संकुलामध्ये वाहतूक कोंडीचे प्रमाण वाढले आहे. वाहतुकीचा गंभीर प्रश्न सोडवण्यासाठी सांताक्रुझ-चेंबूर जोडरस्ता तयार करण्यात आला. पुढे त्याचा विस्तार देखील करण्यात आला. वांद्रे-कुर्ला संकुलात प्रवेश करण्यासाठी पूर्वमुक्त मार्ग (Eastern freeway) यावरुन जोडरस्ता देखील उभारण्यात आला. परिणामी वाहतूक कोंडीचा त्रास कमी झाला.

बीकेसीला जोडलेल्या जोडमार्गांचा संकुलातील अंतर्गत मार्गांवर परिणाम व्हायला लागला. गर्दीच्या वेळी जोडमार्गांवर वाहनांची संख्या वाढल्याने अंतर्गत रस्त्यांवर वाहतूक कोंडीची समस्या वाढायला लागली. संकुलामध्ये जवळच्या ठिकाणी जाण्यासाठीही लोकांना वाहतूक कोंडीला सामोरे जावे लागत होते. ही समस्या दूर करण्यासाठी मुंबई महानगर प्रदेश विकास प्राधिकरणाद्वारे (MMRDA) उपाययोजना करण्यात आली. त्यात पूर्व द्रुतगती महामार्ग आणि वांद्रे कुर्ला संकुल यांना जोडणारा रस्ता बांधण्याचा निर्णय घेण्यात आला.

वांद्रे-कुर्ला संकुल ते पूर्व द्रुतगती मार्ग यांना जोडणारा हा नवा रस्ता म्हणजेच मिसिंग लिंक तयार झाला असल्याची माहिती समोर आली आहे. सोमवारपासून हा रस्ता प्रवासाकरीता खुला करण्यात येणार आहे. या नव्या रस्त्यामुळे प्रवासातला १५ मिनिटांचा कालावधी वाचणार आहे. तसेच एमसीए क्लब, एमटीएनएल जंक्शन येथील वाहतूक कोंडी कमी होण्यास मदत होणार आहे.

‘बीकेसी कनेक्टर’च्या खालून जाणारा हा नवा रस्ता वांद्रे कुर्ला संकुलातील जी ब्लॉकमधील भूखंड क्र. सी ७९ आणि सी ८० यांना जोडतो. हा रस्ता १८० मीटर लांब असून सेबी इमारत एवेन्यू ५ आणि एवेन्यू ३ या दरम्यान आहे. सहा मार्गिका असलेला हा रस्ता तयार करण्यासाठी ३.९८ कोटी रुपये इतका खर्च आला असल्याची माहिती एमएमआरडीएला पदाधिकाऱ्यांनी दिली आहे.

मिसिंग लिंक पूर्ण झाल्याने प्रवास करताना १५ मिनिटांची बचत होईल असल्याने हा रस्ता खुला होणं ही मुंबईकरांसाठी आनंदाची बाब आहे. सोमवारपासून मुंबईकर या रस्त्याने प्रवास करु शकणार आहेत.