संघर्ष गांगुर्डे, साम टीव्ही, कल्याण

महाराष्ट्रातील शेतकरी अतिवृष्टीमुळे मोठ्या संकटात सापडले असून, राज्यातील अनेक भागांमध्ये शेतीचे मोठ्या प्रमाणावर नुकसान झाले आहे. या पार्श्वभूमीवर शेतकरी बांधवांच्या दुःखात सहभागी होत यंदा डोंबिवलीतील भव्य रासरंग दांडिया उत्सव रद्द करण्याचा निर्णय डॉ. श्रीकांत शिंदे फाउंडेशन आणि नवदुर्गा मित्र मंडळाने घेतला आहे.

डॉ. श्रीकांत शिंदे फाउंडेशनच्या माध्यमातून दरवर्षी डोंबिवलीमध्ये रासरंग दांडिया उत्सवाचे उत्साहात आणि भव्य स्वरूपात आयोजन केले जाते. या उत्सवाला केवळ डोंबिवलीतूनच नव्हे, तर कल्याण, ठाणे, उल्हासनगर, अंबरनाथ आणि संपूर्ण परिसरातून हजारो नागरिक, विशेषतः तरुण-तरुणी मोठ्या संख्येने हजेरी लावतात. नवरात्रोत्सवातील या सांस्कृतिक सोहळ्याची उत्सुकता नागरिकांना वर्षभर असते. मात्र, यंदा राज्यातील शेतकऱ्यांवर ओढवलेल्या नैसर्गिक संकटाच्या पार्श्वभूमीवर हा उत्सव आयोजित न करण्याचा निर्णय आयोजकांनी जाहीर केला आहे.

अतिवृष्टीमुळे शेतकरी कुटुंबांसमोर मोठे आर्थिक संकट उभे राहिले आहे. अशा परिस्थितीत उत्सव साजरा करण्यापेक्षा संकटात सापडलेल्या शेतकरी बांधवांच्या पाठीशी उभे राहणे अधिक महत्त्वाचे असल्याची भूमिका आयोजकांनी घेतली आहे. शेतकरी कुटुंबांना केवळ शेतीच्या नुकसानीतून सावरण्यासाठीच नव्हे, तर मुलांच्या शिक्षणापासून त्यांच्या लग्नासारख्या महत्त्वाच्या कौटुंबिक जबाबदाऱ्यांपर्यंत मदतीची गरज आहे.

या कठीण काळात शेतकरी कुटुंबे एकटी नाहीत, त्यांच्यासोबत समाजानेही उभे राहिले पाहिजे, असा संदेश या निर्णयातून देण्यात आला आहे. शेतकऱ्यांच्या संकटाच्या काळात राज्य सरकार आणि उपमुख्यमंत्री एकनाथ शिंदे यांनी त्यांच्या पाठीशी उभे राहण्याची भूमिका घेतली आहे. त्याच भावनेतून डॉ. श्रीकांत शिंदे फाउंडेशनने यंदाचा रासरंग दांडिया उत्सव रद्द करण्याचा निर्णय घेतला आहे.

उत्सवापेक्षा माणुसकी आणि सामाजिक बांधिलकी महत्त्वाची, हा संदेश देत शेतकरी बांधवांच्या दुःखात सहभागी होण्याचा निर्णय फाउंडेशनने घेतला आहे. त्यामुळे दरवर्षी हजारो नागरिकांच्या उपस्थितीत रंगणारा डोंबिवलीतील रासरंग दांडिया उत्सव यंदा होणार नसल्याचे आयोजक आमदार राजेश मोरे यांनी सांगितले.