डोंबिवलीतील एमआयडीसीमध्ये झालेल्या स्फोटामुळे संपूर्ण मुंबई हादरली आहे. या घटनेमध्ये आतापर्यंत ११ जणांचा मृत्यू झाला आहे. तर जखमींची संख्या ६० च्या पुढे पोहचली आहे. मृतांच्या नातेवाईकांनी रडून मोठा आक्रोश व्यक्त केला आहे. त्यातीलच एक अमित खानविलकर. अमित यांच्या पत्नीचा या स्फोटात दुर्दैवी मृत्यू झाला आहे.

अमित यांच्या पत्नी रिद्धी खानविलकर (वय ३६) डोंबिवली एमआयडीसी परिसरातील अमुदान कंपनीत अकाउंटचं काम करत होत्या. अंबर अमुदान केमिकल्स प्रायव्हेट लिमिटेडमध्ये स्फोट झाल्याची बातमी सर्वत्र वाऱ्याच्या वेगाने पसरली. अमित यांना ही माहिती समजताच त्यांच्या काळजाचही धस्स झालं. त्यांनी पत्नी पत्नीला खूप कॉल केले. मात्र फोनवर काही बातचीत झाली नाही.

कासावीस झालेल्या जीवाने त्यांनी आपल्या मित्रांना आणि नातेवाईकांना याबाबत कळवले. घटनास्थळी धाव घेत आपल्या पत्नीची शोधाशोध सुरू केली. मात्र तिथे काहीच तपास लागत नव्हाता. त्यामुळे त्यांनी रिद्धी यांचे फोटो मित्रांना आणि विविध हॉस्पीटलच्या व्हॉट्सअॅप ग्रुपवर पाठवले. कुठे तरी आपल्या पत्नीची माहिती मिळेल या आशेने ते धडपडत होते.

काहीवेळाने अमित यांच्या मित्रांना एका डॉक्टरांचा फोन आला. मृतदेह ज्या हॉस्पीटलमध्ये आहेत तेथे एकदा तपासा असं त्यांनी सांगितलं. त्यावेळी अमित यांनी तात्काळ तेथे धाव घेतली. तेव्हा त्यांच्यासमोर दोन महिलांचे मृतदेह जळालेल्या अवस्थेत होते. चेहरापाहून मृतदेहाची ओळख पटवणे फार कठीण होते. मात्र अमित यांना त्यांच्या पत्नी रिद्धी यांची अंगठी दिसली. बोटातली अंगठी आपल्या पत्नीची असल्याचं समजताच त्यांच्या पायाखालची जमीन सरकली.

दोन महिलांमध्ये दुसरा मृतदेह रिद्धी यांच्यासोबत काम करणाऱ्या रोहिणी कदमचा (वय २६ ) होता. तिचा चुलत आणि सख्खा भाऊ रुग्णालयात आला होता. आपल्या बहिणीची ओळख पटवण्यासाठी आल्यावर चेहरा पाहून काहीच समजत नव्हते. मात्र तिने सकाळी ऑफिसला निघताना ज्या रंगाचा ड्रेस घातला होता त्या रंगावरून आणि तिच्या दातांना लावलेल्या तारेवरून भावांनी आपल्या बहिणीची ओळख पटवली आहे.