सचिन जाधव, साम टीव्ही

पुण्यात गुन्ह्यांची मालिका सुरू असल्याचे दिसून आहे. पुण्यात एका मुलीने बापाची हत्या केल्याची धक्कादायक घटना घडली आहे. हत्येची घटना रविवारी रात्री ११ वाजता घडली. पुण्यातील खडक पोलीस स्टेशनच्या हद्दीतील काशेवाडीतून हा प्रकार समोर आला आहे. हत्येच्या घटनेने परिसरात खळबळ उडाली आहे.

मिळालेल्या माहितीनुसार, पुण्यातील काशेवाडीत राहणाऱ्या ७० वर्षीय जैनुदीन दस्तगीर फुलारी यांची हत्या करण्यात आली आहे. जैनुदीन यांची हत्या त्यांच्या मुलीनेच केल्याचे समोर आलं आहे. त्यांच्या ४० वर्षीय मुलीने ही हत्या केली. दिलशाद जैनुदीन फुलारी असे हत्या करणाऱ्या महिलेचे नाव आहे. खडक पोलिसांनी या प्रकरणी गुन्हा दाखल केला आहे. तसेच पोलिसांनी आरोपी मुलीला देखील अटक केली आहे.

नेमकं काय घडलं?

पोलिसांनी दिलेल्या माहितीनुसार, जैनुद्दीन हे त्यांची पत्नी आणि मुलगी दिलशाद फुलारीसोबत एकत्र राहत होते. जैनुद्दीन यांची मुले वेगळी राहतात. दिलशाद हिचा विवाह झालेला नाही. जैनुद्दीन फुलारी हे दररोज दारू पिऊन घरी यायचे. घरी आल्यावर दिलशादला शिवीगाळ करायचे.

जैनुद्दीन फुलारी हे रविवारी देखील दारू पिऊन आले होते. घरात आल्यानंतर दिलशाद हिला शिवीगाळ करायला लागले. त्यातून दोघांमध्ये शाद्बिक बाचाबाची झाली. रागाच्या भरात दिलशादने घरातील किचन ओट्यावर ठेवलेला कांदा कापण्याचा धारदार चाकू हातात घेतला. त्यानंतर दिलशादने वडिलांच्या छातीवर वार केला.

हल्ल्यानंतर ते जागेवरच कोसळले. जखमी झालेल्या जैनुद्दीन यांना तातडीने रुग्णालयात दाखल केलं. हल्ला केल्यानंतर जैनुद्दीन यांना अधिक रक्तस्त्राव झाल्याने त्यांचा मृत्यू झाला. या प्रकरणी पोलिसांनी हत्येचा गुन्हा दाखल करत दिलशाद फुलारीला अटक केली आहे. सहायक पोलीस उपनिरीक्षक कुलदीप व्हटकर तपास करीत आहेत.