• मुख्यमंत्री देवेंद्र फडणवीस यांनी मोठा निर्णय घेतला

• आज राज्य मंत्रिमंडळाची महत्वाची बैठक पार पडली

• ॲमिटी विद्यापीठाला १५ एकर जमीन मंजूर

• रायगडमध्ये शैक्षणिक विस्तारासाठी जमीन वाटप

राज्याचे मुख्यमंत्री देवेंद्र फडणवीस यांच्या अध्यक्षतेखाली आज राज्य मंत्रिमंडळाची महत्वाची बैठक पार पडली. या बैठकीत एक महत्वाचा निर्णय घेण्यात आला. रायगड जिल्ह्यातील ॲमिटी विद्यापीठाच्या विस्तारासाठी रितनंद बलवेद एज्युकेशन फाऊंडेशनला भाताण येथील जमीन देण्याबाबत निर्णय घेण्यात आला. महसूल व वन विभागांतर्गत हा निर्णय घेण्यात आला आहे.

रायगडच्या पनवेलजवळ असलेल्या ॲमिटी विद्यापीठाची मुळ संस्था असलेल्या रितनंद बलवेद एज्युकेशन फाऊंडेशन या शैक्षणिक संस्थेला मौजे भाताण येथील १५ एकर जमीन देण्याबाबतची मान्यता आज मंत्रिमंडळ बैठकीत देण्यात आली. आखाती देशातील संकटानंतर पंतप्रधान नरेंद्र मोदी यांनी इंधन बचतीबाबत केलेल्या आवाहनानंतर राज्य सरकारने मंत्रिमंडळ बैठक ऑनलाइन घेण्याचा निर्णय घेतला. त्यानंतर ही पहिलीच ऑनलाइन बैठक आज पार पडली. या बैठकीत एकच महत्वाचा निर्णय घेण्यात आला.

रितनंद बलवेद एज्युकेशन फाऊंडेशनच्या या ॲमिटी विद्यापीठांतर्गत १८ शाखांमधून विविध शैक्षणिक अभ्यासक्रम शिकवले जात आहेत. याठिकाणी ५००० पेक्षा अधिक विद्यार्थी शिक्षण घेत आहेत. या विद्यापीठातील इतर अभ्यासक्रम आणि शैक्षणिक विस्तारासाठी संस्थेने महाराष्ट्र सरकारकडे जमिनीची मागणी केली आहे. त्यानुसार सरकारने या विद्यापीठाला १५ एकर जमीन देण्याचा निर्णय घेतला आहे.

रायगडमधील पनवेल तालुक्यात असेलेल्या भाताण येथील ( स.न. ८/०, ९/२, १०/३, १३/५, १४/०,, १६७/१, १७८/०, १८२/४) या आकारीपड जमिनीपैकी सुमारे १५ एकर जमीन विशेष बाब म्हणून देण्यास मंजुरी देण्यात आली. ही जमीन कब्जेहक्काची रक्कम भरून घेऊन वर्ग-२ या धारणाधिकाराने उपलब्ध करून दिली जाणार आहे. या जमिनीचा वापर शैक्षणिक संकुल तसेच खेळाची मैदाने, वसतीगृहे, ग्रंथालय, प्रयोगशाळा अशा शैक्षणिक कारणासाठी केला जाणार असल्याची माहिती विद्यापीठाने दिली आहे.