BMC News:

बृहन्मुंबई महानगरपालिकेच्या एफ दक्षिण विभागामार्फत गौतम नगर येथील अनधिकृत बांधकाम निष्कासितक करण्यात आली. बृहन्मुंबई कर्मचाऱ्यांसाठीच्या आश्रय आवास योजनेच्या अंमलबजावणीला अडथळा ठरणारी ही ३१ बांधकामे निष्कासन कारवाईत हटविण्यात आली. मुंबई पोलिसांची मदत घेऊन गौतम नगर येथे एफ दक्षिण विभागाच्या अधिकारी आणि कर्मचाऱ्यांनी ही कारवाई केली. (Latest News)

गौतम नगर येथे आश्रय आवास योजनेअंतर्गत नवीन घरे बांधण्याच्या प्रकल्पातील मोठा अडथळा यानिमित्ताने दूर झाला आहे. गत अनेक वर्षांपासून याठिकाणी अनधिकृत बांधकामांमुळे योजनेच्या अंमलबजावणीला वेग मिळत नव्हता. परंतु एफ दक्षिण विभागामार्फत नुकत्याच झालेल्या कारवाईमुळे आता या प्रकल्पाला गती मिळणार आहे. परिणामी चतुर्थ श्रेणी कर्मचाऱ्यांना या योजनेअंतर्गत घरे प्राप्त होऊन निवारा उपलब्ध होईल.

 ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

बृहन्मुंबई महानगरपालिकेचे उप आयुक्त (परिमंडळ २) रमाकांत बिरादार आणि एफ दक्षिण विभागाचे सहायक आयुक्त महेश पाटील यांच्या मार्गदर्शनाखाली ही कारवाई करण्यात आली. एफ दक्षिण विभागातील कामगार आणि अधिकारी मिळून तब्बल १३० मनुष्यबळ आणि त्यांच्या मदतीला ३ जेसीबी, २ डंपर, २ वाहने यांच्या सहाय्याने ही कारवाई तडीस गेली. तर पोलीस दलाचे अधिकारी, कर्मचारी मिळून ९५ जणांचे मनुष्यबळ या कारवाई प्रसंगी बंदोबस्त स्वरूपात तैनात होते.