रेल्वे प्रवाशांसाठी महत्त्वाची बातमी! येत्या १४ एप्रिल रोजी लोकलने प्रवास करणार असाल तर घराबाहेर पडण्याआधी हे वेळापत्रक नक्की वाचा. १४ एप्रिल रोजी डॉ. बाबासाहेब आंबेडकर जयंतीनिमित्त मध्य रेल्वेद्वारे ४ विशेष उपनगरी गाड्या चालविण्यात येणार आहे. डॉ. बाबासाहेब आंबेडकर जयंतीनिमित्त अनेक अनुयायी प्रवास करतात त्यांची गैरसोय होऊ नये, तसेच कोणताही अनुचित प्रकार घडू नये म्हणून रेल्वेने हा निर्णय घेतला आहे.

डॉ. बाबासाहेब आंबेडकर यांच्या जयंतीनिमित्त सोमवार व मंगळवार दिनांक १३ आणि १४ एप्रिल २०२६ रोजी मध्यरात्री मध्य रेल्वेकडून ४ विशेष उपनगरी गाड्या चालविण्यात येणार आहेत. मध्य रेल्वे मार्गावर विशेष गाडी छत्रपती शिवाजी महाराज टर्मिनस येथून ०१.३० वाजता सुटेल व कल्याण येथे ०३.०० वाजता पोहोचेल. तसेच कल्याण येथून ०१.३० वाजता लोकल सुटेल व छत्रपती शिवाजी महाराज टर्मिनस येथे ०३.०० वाजता पोहोचेल.

हार्बर मार्गावर छत्रपती शिवाजी महाराज टर्मिनस येथून ०१.३० वाजता लोकल सुटेल व पनवेल येथे ०२.५० वाजता पोहोचेल. तसेच उपनगरी विशेष गाडी पनवेल येथून ०१.३० वाजता सुटेल व छत्रपती शिवाजी महाराज टर्मिनस येथे ०२.५० वाजता पोहोचेल.मंगळवारी म्हणजेच १४ फेब्रुवारी रोजी उपनगरी सेवा नेहमीप्रमाणे असेल. डॉ. बाबासाहेब आंबेडकर जयंतीनिमित्त दरवर्षी लाखो अनुयायी मुंबईत येतात. यावेळेस कोणत्याही प्रकारचा अनुचित घटना घडू नयेत, या पार्श्वभूमीवर हा निर्णय घेण्यात आला असल्याचे रेल्वेने म्हटले आहे.