नवी मुंबई : महिलेस जीवे मारण्याची धमकी दिल्याप्रकरणी माजी मंत्री व भाजपचे ऐरोलीचे आमदार गणेश नाईक (Ganesh Naik) यांच्यावर बेलापूरच्या सीबीडी पोलीस स्टेशनमध्ये गुन्हा दाखल करण्यात आला आहे. नाईक यांनी २०२१ मध्ये आपल्यावर रिव्हॉल्व्हर (Revolver) रोखून जीवे मारण्याची धमकी दिल्याचा आरोप या पीडित महिलेने केला होता. या प्रकरणाची राज्य महिला आयोगाने दखल घेतल्यानंतर महिलेच्या तक्रारीवरून नाईकांवर गुन्हा दाखल करण्यात आला आहे. (Ganesh Naik Latest News)

हे देखील पहा :

४७ वर्षीय पीडित महिलेच्या म्हणण्यानुसार, सदर महिला व आमदार गणेश नाईक हे गेल्या २७ वर्षांपासून लिव्ह-इन-रिलेशनशिपमध्ये (Live In Relationship) राहत आहेत. या नात्यातून त्यांना एक मुलगा देखील झालेला आहे. या मुलाचा स्वीकार करण्यात यावा तसेच मुलास वडील म्हणून नाईक यांचे नाव देण्यात यावे अशी मागणी पीडितेने नाईक यांच्याकडे केली होती. मात्र, गणेश नाईक यांनी वडील म्हणून मुलास आपले नाव देण्यास विरोध करत २०२१ मध्ये सीबीडी बेलापूरमधील (CBD) त्यांच्या कार्यालयात रिव्हॉल्व्हरचा धाक दाखवून आपल्याला जीवे मारण्याची धमकी दिली असा आरोप या महिलेने केला आहे. यावरूनच हा गुन्हा दाखल करण्यात आला आहे.

याआधीही पीडितेने नेरूळ पोलीस स्टेशनमध्ये नाईक यांच्याविरोधात तक्रार दिली होती. मात्र, त्यांच्यावर गुन्हा दाखल करण्यात आला नाही. त्यानंतर या महिलेने राज्य महिला आयोगाकडे धाव घेतली होती. सदर प्रकरणाची सखोल चौकशी करून कारवाई करण्याच्या सूचना राज्य महिला आयोगाच्या अध्यक्षा रूपाली चाकणकर (Rupali Chakankar) यांनी पोलिसांना दिल्या होत्या. तसेच गणेश नाईक यांनी स्वत: पुढे येऊन डीएनए (DNA) चाचणी करावी व याबाबत स्पष्टीकरण द्यावे, अशी मागणी शिवसेना नेत्या व विधान परिषदेच्या उपाध्यक्षा नीलम गोऱ्हे (Nilam Gorhe) यांनी केली आहे.

Edited By : Krushnarav Sathe