मुंबई : मीरा-भाईंदरचे भारतीय जनता पक्षाचे माजी आमदार नरेंद्र मेहता (Narendra Mehta) यांना मुंबई उच्च न्यायलायकडून (Mumbai High court) दिलासा मिळाला आहे. काही दिवसांपूर्वी लाचलुचपत प्रतिबंधक विभागाने नरेंद्र मेहता यांच्यावर गुन्हा दाखल केला होता. मेहता यांच्यावर भ्रष्टाचाराचे आरोप (corruption) करण्यात आले होते. दरम्यान, या प्रकरणाची सुनावणी मुंबई उच्च न्यायालयात झाली असून मेहता यांना अटकेच्या कारवाईपासून तात्पुरता दिलासा मिळाला आहे. ३० मे पर्यंत मेहता यांना अटक न करण्याचे निर्देश मुंबई उच्च न्यायालयाने तपास यंत्रणांना दिले आहेत.

मिळालेल्या माहितीनुसार, मीरा-भाईंदरचे माजी आमदार नरेंद्र मेहता यांच्यावर लाचलुचपत प्रतिबंधक विभागाने भ्रष्टाचाराच्या आरोपाखाली गुन्हा दाखल केला होता. त्यानंतर लाचलुचपत प्रतिबंधक विभागाने मेहतांच्या घरी छापा टाकून महत्वाचे दस्तऐवज जप्त केले.

त्यानंतर मेहतांवर अटकेची टांगती तलवार होती. अटकेच्या कारवाईपासून दिलासा मिळण्यासाठी मेहता यांनी मुंबई उच्च न्यायालयात याचिका दाखल केली होती. त्यानंतर आता न्यायालयाकडून मेहता अटकेपासून दिलासा देण्यात आला असून ३० मे रोजी पुढील सुनावणी होणार आहे.

Edited By - Naresh Shende