मयुरेश कडव, बदलापूर

बदलापूर शहरालगतच्या शिरगाव परिसरात रस्त्यामधून अचानक धूर निघू लागल्याने नागरिकांमध्ये प्रचंड भीतीचे वातावरण निर्माण झाले . धुराचे लोट मोठ्या प्रमाणात दिसू लागल्याने परिसरातील नागरिकांनी सुरक्षिततेच्या दृष्टीने घराबाहेर पडणे टाळले, तसेच तातडीने स्थानिक प्रशासनाला याची माहिती देण्यात आली. प्राथमिक माहितीनुसार, ही घटना केमिकल गळतीशी संबंधित असण्याची शक्यता व्यक्त केली जात असून, अधिकृत कारण अद्याप समोर आलेले नाही.

शिरगाव परिसरात यापूर्वीही वायू गळतीच्या घटना घडल्या आहेत. त्यामुळे या नव्या घटनेमुळे नागरिकांच्या मनातील भीती आणखी वाढली आहे. धुरामुळे परिसरात दुर्गंधी पसरल्याची माहिती काही स्थानिकांनी दिली असून, आरोग्यावर परिणाम होण्याची शक्यताही व्यक्त केली जात आहे. प्रशासन आणि संबंधित यंत्रणांकडून घटनास्थळी पाहणी सुरू असून, धुराचे नेमके कारण शोधण्याचे काम सुरू आहे.

या घटनेनंतर शिरगाव, खरवई आणि माणकिवली एमआयडीसी परिसरातील रासायनिक उद्योग पुन्हा एकदा चर्चेत आले आहेत. स्थानिक नागरिकांनी प्रदूषण नियंत्रण मंडळाच्या कार्यपद्धतीवर प्रश्नचिन्ह उपस्थित करत संबंधित कंपन्यांवर कठोर कारवाईची मागणी केली आहे.

परिसरात वारंवार अशा घटना घडत असतानाही प्रभावी उपाययोजना होत नसल्याचा आरोप नागरिकांकडून करण्यात येत आहे. या संपूर्ण प्रकरणाचा सखोल तपास करून सत्य परिस्थिती समोर आणावी आणि भविष्यात अशा घटना टाळण्यासाठी आवश्यक ती पावले उचलावीत, अशी मागणी स्थानिकांकडून करण्यात येत आहे.