मयुरेश कडव, बदलापूर

बदलापूरजवळील सागाव गावात एका 23 वर्षीय तरुणाचा गोळी लागून मृत्यू झाल्याची धक्कादायक घटना समोर आली आहे. या घटनेमुळे संपूर्ण परिसरात खळबळ उडाली असून पोलिसांनी तपासाची चक्रे वेगाने फिरवली आहेत. मृत तरुणाचे नाव भुवन कृष्णा पाटील असे असून तो सागाव परिसरात क्रिकेट टर्फचा व्यवसाय चालवत होता.

मिळालेल्या प्राथमिक माहितीनुसार, भुवन पाटील नेहमीप्रमाणे आपल्या क्रिकेट टर्फवर गेला होता. दरम्यान, अचानक गोळीबार झाल्याची घटना घडली. भुवनच्या छातीत गोळी लागल्याने त्याचा जागीच मृत्यू झाला. काही वेळानंतर त्याचा मृतदेह टर्फलगतच्या लॉनमध्ये रक्ताच्या थारोळ्यात पडलेल्या अवस्थेत आढळून आला.

ही माहिती समोर येताच स्थानिक नागरिकांनी घटनास्थळी मोठी गर्दी केली. घटनेची माहिती मिळताच बदलापूर ग्रामीण पोलिसांचे पथक तातडीने घटनास्थळी दाखल झाले. पोलिसांनी परिसराचा पंचनामा करून मृतदेह शवविच्छेदनासाठी पाठवला आहे.

तसेच घटनास्थळावरील पुरावे गोळा करण्याचे काम सुरू करण्यात आले आहे. या घटनेमुळे सागाव आणि बदलापूर परिसरात हळहळ व्यक्त केली जात आहे. हा प्रकार नेमका कसा घडला, याबाबत अद्याप कोणतीही अधिकृत माहिती समोर आलेली नाही. भुवनने स्वतःवर गोळी झाडून आत्महत्या केली, की त्याच्याकडून चुकून गोळीबार झाला, अथवा हा घातपाताचा प्रकार आहे? या सर्व बाजूंनी पोलीस तपास करत आहेत.