संजय गडदे, साम टीव्ही

भाजप नेते अमित साटम, मंगल प्रभात लोढा आणि अतुल भातखळकर यांच्यावर खोटे आरोप करून राजकीय वातावरण बिघडवण्याचा प्रयत्न केल्याचा आरोप काँग्रेस नेते आणि माजी मंत्री असलम शेख यांनी केला आहे. भाजपने ज्या व्हिडिओ क्लिपचा उल्लेख केला, त्यात कुठेही त्यांनी कोणालाही धमकी दिल्याचे दिसत नाही,असेही असलम शेख यांनी म्हटलं.

'आपल्याला वाटतं म्हणून मी चुकीचा कसा? व्हिडिओमध्ये काहीच नाही. उलट मला धमक्या भाजपचेच नेते देत आहेत, असं शेख हे अतुल भातखळकर यांच्या आरोपांवर म्हणाले. शेख यांनी सांगितले की त्यांच्या विरोधात गुन्हा दाखल करण्यासाठी पोलिसांवर दबाव टाकला जात आहे. पोलीस स्टेशनच्या बाहेर त्यांचे बॅनर फाडण्यात आले आणि शिवीगाळ करण्यात आली, यावर पोलीस काय कारवाई करतात याकडे सर्वांचे लक्ष आहे'.

चारशे घरांच्या तोडक कारवाई प्रकरणावर बोलताना शेख म्हणाले की, 'बांगलादेशी किंवा रोहिंग्या असतील तर गृहमंत्रालय कारवाई करणार की नाही? त्या ठिकाणी 60 टक्के हिंदूंची घरे होती. यावर उत्तर द्यायला हवं' लोकांच्या खऱ्या प्रश्नांवर चर्चा न करता ‘खान, पठाण, शेलार, शिंदे’ या नावांवरच राजकारण केले जात असल्याचा आरोप करत त्यांनी म्हटलं की हे मुद्दे लोकांना रुचत नाहीत, मुंबईच्या समस्यांवर चर्चा होणे गरजेचे आहे.

भाजपचे आमदार असलम शेख यांच्या विरोधात आंदोलन

मुंबईच्या मालाड पश्चिमेकडील मालवणी परिसरात काँग्रेस आमदार असलम शेख यांच्या विरोधात आज भाजपच्या युवा मोर्चाच्या माध्यमातून आंदोलन करण्यात आलं. मालवणी अग्निशमनजवळ असणाऱ्या आमदार शेख यांच्या कार्यालयावर आंदोलन करण्यात आलं. या पार्श्वभूमीवर मुंबई पोलिसांकडून या ठिकाणी मोठा बंदोबस्त आता तैनात करण्यात आला होता. भाजप कार्यकर्त्यांनी यावेळी असलम शेख यांच्या विरोधात जोरदार घोषणाबाजी केली.