मुंबई : महाराष्ट्र-कर्नाटक सीमावादावर सर्वात मोठी घडमोड समोर आली आहे. कर्नाटक-महाराष्ट्र सीमाभागातील वादात केंद्रीय गृहमंत्री अमित शाह आता मध्यस्थी करणार आहेत. मुख्यमंत्री - उपमुख्यमंत्री उद्या दिल्ली दौऱ्यावर जाणार असल्याची माहिती समोर येत आहे.

कर्नाटक सीमावादाच्या प्रश्नावर दिल्लीत लवकरच बैठक पार पडणार आहे. केंद्रीय गृहमंत्री अमित शहा यांच्या उपस्थितीत ही बैठक पार पडणार आहे. या बैठकीला कर्नाटकचे मुख्यमंत्री उपस्थित राहण्याची शक्यता आहे.

दोन्ही राज्यात सीमावादामुळे अनेक प्रकल्पांना फटका बसला आहे. तर अनेक उद्योगधंदे ठप्प झाले आहेत. दोन्ही राज्यातील तणावाचे वातावरण बघता ही बैठक पार पडणार आहे.

गेल्या काही दिवसांपासून महाराष्ट्र आणि कर्नाटक राज्यातील सीमावाद पेटला आहे. कर्नाटकचे मुख्यमंत्री बसवराज बोम्मई यांनी महाराष्ट्रातील काही गावांवर आपला दावा सांगितल्याने दोन्ही राज्यातील सीमावर्ती भागात तणावाचं वातावरण निर्माण झालं आहे.

कर्नाटकच्या मुख्यमंत्र्यांच्या बेताल वक्तव्यानंतर महाराष्ट्राच्या काही वाहनांवर कर्नाटकमध्ये हल्ला करण्यात आला. तर कर्नाटकच्या काही वाहनांवर महाराष्ट्रात काळं फासण्यात आलं. यामुळे परिस्थिती आणखीच चिघळली आहे. याच मुद्द्यावर राज्यात विरोधक आक्रमक झाले आहे. त्यामुळे अमित शाह यांच्यासोबत लवकरच होणारी बैठक महत्त्वपूर्ण आहे.