विकास काटे, ठाणे प्रतिनिधी

Ajit Pawar NCP Mumbra Leader Pravin Pawar Attack राज्यात २९ महापालिकेच्या महापौर पदाची खुर्ची कोणाला मिळणार यासाठी चढाओढ सुरु असतानाच मुंब्र्यातून मोठी बातमी समोर आली आहे. प्रभाग क्रमांक ३१ मधील अजित पवार गटाच्या उमेदवार मनीषा प्रवीण पवार यांचे पती प्रवीण पवार यांच्यावर, मुंब्रा येथील सम्राट नगर येथे विरोधकांनी धारदार शस्त्राने हल्ला केल्याची धक्कादायक घटना घडली आहे. याप्रकरणी पोलीस ठाण्यात गुन्हा दाखल करण्यात आला आहे.

राज्यात नुकत्याच पार पडलेल्या पालिका निवडणुकीनंतर, राष्ट्रवादी कॉँग्रेसच्या दोन्ही गटात वाद सुरू झाले आहेत. ठाणे महापालिका निवडणुकीत प्रवीण पवार यांच्या पत्नी मनीष पवार यांना राष्ट्रवादी काँग्रेस (अजित पवार) गटाकडून आणि राष्ट्रवादी काँग्रेस (शरद पवार) यांच्या उमेदवार पल्लवी शिवा जगताप यांच्या विरोधात निवडणूकीच्या रिंगणात उतरवले होते.

मात्र मनीषा पवार यांचा पराभव झाला. निवडणुकीतील विजयानंतर प्रवीण पवार आणि शिवा जगताप यांच्यात अनेक वेळा वाद झाले होते. या वादातून प्रविण पवार यांच्यावर काल रात्री धारदार शस्त्राने हल्ला झाला. शिवा जगताप यांचे भाऊ अप्पा जगताप यांनी त्यांच्यावर धारदार शस्त्राने हल्ला केला असून हल्ल्यानंतर हल्लेखोर घटनास्थळावरुन पळून गेला आहे.

प्रविण पवार यांच्या मानेवर आणि चेहऱ्यावर वार करण्यात आले आहेत. निवडणुकी दरम्यान झालेल्या वादातून हा हल्ला झाल्याचा आरोप प्रविण पवार यांनी केला आहे. या प्रकरणी मुंब्रा पोलीस ठाण्यात गुन्हा दाखल करण्यात आला आहे. मध्यरात्री झालेल्या घटनेने परिसरात खळबळ उडाली असून मुंब्र्यातील राजकारण तापले असल्याचे पाहायला मिळतं आहे.