“मी एक चारित्र्यवान कलावंत असून भाजप नेत्या चित्रा वाघ यांनी पॉर्न स्टारची उपमा देऊन माझा अपमान केला आहे. त्यामुळे येत्या दोन दिवसांत त्यांनी माझी माफी मागावी. अन्यथा, अब्रुनुकसानी दावा दाखल करणार ” असा इशारा अभिनेते प्याराली उर्फ राज नयानी यांनी दिला आहे.
"भाजपच्या नेत्या चित्रा वाघ एक सुशिक्षित महिला आहेत. कलावंत जेव्हा एखाद्या सिनेमांत किंवा मालिकेत काम करतो, तेव्हा त्याला त्या भूमिकेची जशी मागणी असते. त्याप्रमाणे अभिनय करावा लागतो. हे त्यांना माहीत असावे", असंही राज नयानी यांनी म्हटलं आहे.
"चित्रा वाघ यांनी एका वेब सीरिज मधील माझा फोटो दाखवून मी पॉर्न स्टार असल्याचा दावा केला. त्यांच्या या दाव्याची मी निंदा करतो, असं राज नयानी म्हणाले. त्यांनी प्रेस कॉन्फरेन्समध्ये जे फोटो दाखवले. ते एका वेबसीरिज मधील आहेत. माझ्या अभिनयातील भूमिकेचा तो एक भाग होता", असंही नयानी यांनी म्हटलंय.
"शिवसेना उद्धव बाळासाहेब ठाकरे पक्षाच्या जाहिरातीत मी काम केले आहे. त्यामुळे चित्रा वाघ यांनी राजकीय सूडबुद्धीने माझा उल्लेख पॉर्न स्टार म्हणून केला आहे. त्यांनी दोन दिवसात माझी जाहीर माफी मागावी, अन्यथा त्यांच्यावर मी अब्रूनुकसान केल्याचा दावा कोर्टात दाखल करेन", असा इशाराही राज नयानी यांनी दिला आहे.
भाजप नेत्या चित्रा वाघ यांनी गुरुवारी जाहीर पत्रकारपरिषद घेत ठाकरे गटावर गंभीर आरोप केले. निवडणुकीच्या प्रचारासाठी उद्धव सेनेने पॉर्न स्टारला घेऊन जाहिरात बनविल्या, असं चित्रा वाघ यांनी म्हटलंय.
उद्धव सेनेची निवडणूक प्रचाराची जाहिरात बनवणारी कंपनी, ठाकरे परिवार तसेच, जाहिरातीमध्ये पित्याची भूमिका वठविणारा पॉर्न स्टार आणि उद्धवसेना यांचा संबंध काय आहे, असा सवालही चित्रा वाघ यांनी केला.
ही जाहिरात पाहून स्त्री, पत्नी, आई आणि मुलगी म्हणून माझी मान शरमेने खाली झुकली गेली. हा पॉर्नस्टार महिलांवरील अत्याचार कधी थांबणार असा प्रश्न विचारतो, यासारखी महिलांची क्रूर चेष्टा नाही, असे त्या म्हणाल्या.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.