मुरबाड तालुक्यातील इंदे गावातून एक धक्कादायक बातमी समोर येत आहे. अंगावर वीज पडून एका १६ वर्षीय मुलाचा दुर्देवी मृत्यू झाला आहे. त्याने नुकतीच दहावीची परीक्षा दिली होती. पुढील शिक्षणाची तो तयारी करत होता. मात्र आज संततधार सुरू असलेल्या पावसात तो घराबाहेर पडला आणि त्याच्या अंगावर वीज कोसळली. यात त्याचा जागीच मृत्यू झाला. या घटनेनंतर गावात शोककळा पसरली आहे.

सध्या राज्यातील बऱ्याच जिल्ह्यांमध्ये पावसाची संततधार सुरू आहे. मुरबाड तालुक्यातही पावसाने दमदार हजेरी लावली. मात्र, या पावसानं बळी घेतले आहेत. या पावसामुळे एका मुलाचाही मृत्यू झाला आहे. यश रमेश लाटे असे १६ वर्षीय मुलाचे नाव आहे. तो मुरबाड तालुक्यातील इंदे गावातील रहिवासी होता.

यशने नुकतीच दहावीची परीक्षा दिली होती. तो पुढील शिक्षणाची तयारी करत होता. दरम्यान, त्याच्यासोबत काल सायंकाळी दुर्देवी घटना घडली. मुसळधार पाऊस पडत असल्यामुळे यश गुरे बांधण्यासाठी गोठ्यात गेला होता.

गुरे बांधण्यासाठी गोठ्यात गेला असताना, अचानक वीज कोसळून त्याचा जागीच मृत्यू झाला. या घटनेने संपूर्ण गावात शोककळा पसरली आहे. दरम्यान, स्थानिक नागरिकांनी प्रशासनाकडे यशच्या कुटुंबीयांना शासकीय मदत देण्याची मागणी केली आहे. मुरबाड तालुक्यात गेल्या काही दिवसांपासून वीजेच्या कडकडाटासह मुसळधार पावसामुळे जनजीवन विस्कळीत झाले आहे.

या दुर्दैवी घटनेमुळे परिसरात हळहळ व्यक्त केली जात असून, प्रशासनाने योग्य ती मदत आणि तपासणी करण्याचे आश्वासन दिले आहे.