Gondia News : भरधाव वेगाने जात असलेली चारचाकी कार अनियंत्रित होवुन रस्त्याचे बाजुला असलेल्या शेतात जावुन कोसळल्याने कारमधे बसलेला युवक गाडीतुन 60 ते 70 फुटांवर जावुन पडल्याने त्याचा जागीच मृत्यू झाल्याची घटना गोंदिया जिल्हाच्या अर्जुनी मोरगाव- नवेगांवबांध मार्गावर पेट्रोल पंप परिसरात घडली आहे. (Maharashtra News)

यामधे डेव्हिड धनराज रहिले (वय 19 राहणार इंजोरी, हल्ली मुक्काम अर्जुनी मोर) असे ठार झालेल्या युवकाचे नाव आहे. तर वैभव उमेश राजाभोज हा कार चालक युवक किरकोळ जखमी झाला आहे.

या भीषण अपघातात ठार झालेला युवक नागपुर येथे प्रियदर्शनी अभियांत्रिक महाविद्यालयात शिक्षणास होता. ताे तीन दिवसापूर्वीच अर्जुनी मोरगावला आला होता. गावातीलच त्याचा मित्र वैभव उमेश राजाभोज आणि डेव्हिड हे भेटले.

त्यांनी अर्जुनी मोरगाव -नवेगांवबांध मार्गावरील पेट्रोल पंपावर पेट्रोल भरले. तिथुन भरधाव वेगाने नवेगांवबांधकडे जात असताना गाडीवरुन नियंत्रण सुटले आणि रस्त्यावरच्या दिशादर्शक फलक तोडुन शंभर फुट चारचाकी उलटत गेली.

या गाडीतुन डेव्हीड हा फुटबॉल प्रमाणे गाडीपासुन 60 ते 70 फुटांवर जावुन पडला व जागीच ठार झाला. या घटनेची माहिती अर्जुनी मोरगाव पोलिसांना ग्रामस्थांनी दिली. पोलीसांनी घटनास्थळ गाठत पंचनामा करून मृतदेह शवविच्छेदनासाठी पाठविला.

Edited By : Siddharth Latkar