Crime News: दारू पिण्यासाठी गेलेल्या तरूणाच्या हातातून दारूचा ग्लास खाली पडून फुटल्याच्या कारणावरून गुत्त्यावरील कामगारांनी त्याला बेदम मारहाण केली. या मारहाणीत त्याचा जागीच मृत्यू झाला. ही धक्कादायक घटना नागपुरातील खडगाव मार्गावरील सायरे देशी दारूगुत्त्यावर घडली असून, या घटनेनंतर पोलिसांनी पाच आरोपींविरोधात गुन्हा दाखल केला. तसेच चौकशी करून पाच आरोपींना अटक केली.

सूरज भलावी (वय २७) असे मृत तरूणाचे नाव आहे. खडगाव मार्गावरील सायरे देशी दारूच्या अड्ड्यावर दारू प्यायला गेला होता. यादरम्यान, दारू प्यायल्यानंतर त्याच्या हातातून दारूचा ग्लास खाली पडला. दारूचा ग्लास काचेचा असल्याकारणामुळे फुटला. याच कारणावरून गुत्त्यावरील कामगारांनी त्याला बेदम मारहाण केली. सुरुवातीला त्याला शिवीगाळ करण्यात आली आणि नंतर जोरदार मारहाण केली.

मारहाणीनंतर सूरज गंभीर जखमी झाला. त्यानंतर त्याला दारूगुत्त्याबाहेर फेकून दिले गेले. सूरजला मारहाण झाल्याची माहिती त्याचा भाऊ सौरभला मिळाल्यानंतर त्याने पोलिसांना याची माहिती दिली. पोलिसांनी सूरजला मेवो हॉस्पिटलमध्ये दाखल केले, मात्र उपचारादरम्यान बुधवारी त्याचा मृत्यू झाला.

सूरजचा भाऊ सौरभने दाखल केलेल्या तक्रारीवरून पोलिसांनी पाच आरोपींविरोधात गुन्हा दाखल केला. तसेच चौकशी करून पाच आरोपींना ताब्यात घेतले आहे. सध्या पुढील तपास पोलिसांकडून सुरू आहे. या घटनेनंतर परिसरात एकच खळबळ उडाली आहे.