पोटच्या ३ वर्षीय मुलाला ओढणीने कंबरेला बांधून एका आईने पाण्यात उडी मारून आयुष्य संपवलं आहे. ही ह्रदयद्रावक घटना परभणी जिल्ह्याच्या गंगाखेड तालुक्यातील भांबरवाडी या गावात घडली. मृत महिलेच्या जवळ एक चिठ्ठी आणि आधार कार्ड सापडलं. आधार कार्डवरून ही महिला भांबरवाडी गावातील रहिवासी असल्याचं कळतंय. या घटनेचा अधिक तपास पोलीस करीत असून, महिलेनं आत्महत्या का केली? याचा तपास सुरू आहे.

प्रतीक्षा भांबरे (वय वर्ष ३०) असे मृत विवाहित महिलेचं नाव आहे. प्रतीक्षा आधी आपल्या ३ वर्षीय मुलाला घेऊन खळी पाटी परिसरातल्या गोदावरी नदीजवळ गेली. तिने ओढणीने कंबरेला आधी आपल्या मुलाला बांधून घेतलं. नंतर नदीपात्रात उडी घेऊन तिनं आत्महत्या केली. नदीपात्रात कुणीतरी बुडत असल्याचं पाहताच परिसरातील नागरिकांनी पोलिसांना याची माहिती दिली.

पोलिसांना माहिती मिळताच त्यांनी तात्काळ घटनास्थळी धाव घेतली. तसेच पोलीस आणि अग्निशमन दलाच्या जवानांनी मृत महिला आणि तिच्या मुलाला बाहेर काढले. मृतांना शवविच्छेदानासाठी गंगाखेड उपजिल्हा रुग्णालयात पाठवण्यात आले आहे. पोलीस तपासात तिच्याजवळ एक चिठ्ठी सापडली आहे. तसेच आधार कार्डही सापडलं आहे.

चिठ्ठीवरील मजकूराच्या आधारे पोलीस पुढील तपास करीत आहे. चिठ्ठीमध्ये नेमकं काय लिहिलं होतं, हे अद्याप समोर आलेले नाही. मात्र, पोलिसांकडून पुढील तपास सुरू आहे. माय लेकाच्या मृत्यूमुळे परिसरात हळहळ व्यक्त केली जात आहे. महिलेनं टोकाचं पाऊल का उचललं? तिने मुलाला देखील आपल्यासोबत का संपवलं? याचाही शोध सुरू आहे.