लोकसभा निवडणुकीत मविआला मिळालेल्या यशानंतर आता शरद पवार नव्या जोमानं कामाला लागले आहेत. विधानसभा निवडणूक जिंकून सत्तांतर करण्यासाठी पवारांनी अभेद्य असं चक्रव्यूह रचायला सुरुवात केलीय.

महाविकास आघाडीने लोकसभेला महायुतीला कात्रजचा घाट दाखवला. आता विधानसभेला महाविकास आघाडीला किती जागा मिळतील याचा थेट आकडाच सांगितला आहे. मविआ 288 पैकी 225 जागांवर विजयी होईल, असा विश्वास शरद पवारांनी व्यक्त केलाय.

लोकसभेला पवारांनी मविआची चांगली मोट बांधली होती. उमेदवारांच्या निवडीपासून ते प्रचाराच्या रणनीतीमध्ये नियोजन अचूक ठरलं होतं. लोकसभा निवडणुकीत मविआला 30 पेक्षा अधिक जागांवर विजय मिळेल, असं भाकीत पवारांनी केलं होतं. हे भाकीत खरं ठरल्यानं पवारांनी आता विधानसभेसाठी मेगाप्लॅन आखलाय.

शरद पवारांचा मेगाप्लॅन काय?

- शरद पवार यांनी आगामी विधानसभा निवडणुकीसाठी 30 उमेदवारांची नावे निश्चित केल्याची माहिती आहे.

- अजित पवार गटातील 18 ते 19 आमदार आपल्या संपर्कात ठेऊन विधानसभेला महायुतीला खिंडीत गाठू शकतात

- राष्ट्रवादीकडून मुंबईमधील विधानसभा मतदारसंघाचा आढावा घेण्यात येणार आहे. गेल्या निवडणुकीत पक्षाने मुंबईत विधानसभेच्या एकूण 6 जागा लढवल्या होत्या. यावर्षी त्याहून अधिक जागा लढवणाचा त्यांचा मानस आहे.

- मविआतील पक्षाची ताकद कुठे कुठे आहे,याचा आढावा घेऊन मविआचा उमेदवार देणार

लोकसभा निवडणुकीत शरद पवार गटाचा 80 टक्क्यांचा स्ट्राईक रेट ही पक्षासाठी जमेची बाजू मानली जातीय. त्यात पवारांचा राजकीय अनुभव पाहता विरोधक यावेळी त्यांना हलक्यात घेण्याची चूक करणार नाहीत, एव्हढं निश्चित...