Chhatrapati Sambhaji Nagar News : छत्रपती संभाजीनगर येथे महानगर पालिकेच्या पाणीपुरवठ्याचे वेळापत्रक कोलमडल आहे. चार दिवसाआड मिळणारं पाणी आता सहा दिवसाआड मिळणार आहे. त्यामुळे नागरिकांना आणखी काटकसरीने पाणी वापरावे लागणार आहे. (Maharashtra News)

छत्रपती संभाजीनगर येथे चार दिवसांपूर्वी पैठण रस्त्याच्या कामात जेसीबीचा धक्का लागल्याने जलवाहिनीवरील व्हॉल्व्ह फुटला. त्यामुळे शहराचा पाणीपुरवठा विस्कळीत झाला. या व्हॉल्व्ह दुरुस्तीसाठी सात तासांचा कालावधी लागला. या काळात जलवाहिनीचा पाणीपुरवठा बंद करण्यात आला होता.

दुसऱ्या दिवशी पहाटे शहरात पाणी आल्यानंतर जलकुंभ भरण्यास तीन ते चार तास लागले. त्यामुळे त्या दिवशी असलेले पाण्याचे टप्पे एक दिवसाने पुढे ढकलण्यात आले. चार दिवसांआड पाणी देण्याचे नियोजन असतानाही पाण्याचे वेळापत्रक कोलमडले आहे.

नव्या जलवाहिन्यांची गरज

परिणामी नागरिकांना सहा दिवसांआड पाणीपुरवठा हाेऊ लागला आहे. विशेष म्हणजे सिडको- हडको भागांसह शहराच्या उर्वरित भागांत पाण्याची ओरड सुरू झाली आहे. शहराला पाणीपुरवठा करणाऱ्या दोन्ही जलवाहिन्या जीर्ण झाल्या आहेत. या जलवाहिन्या कधी फुटतील, कधी त्यांना गळती लागेल, याचा नेम राहिलेला नाही.

Edited By : Siddharth Latkar