संजय जाधव, बुलढाणा|ता. ४ मे २०२४

बुलढाणा जिल्ह्यात पाणीटंचाईची दाहकता वाढली असून टँकरग्रस्त जिल्ह्याच्या दिशेने वाटचाल सुरू झाली आहे. सध्या जिल्ह्यातील ४६ गावांमध्ये ४७ टँकर सुरू आहेत. तसेच आगामी काळात टँकरची संख्या वाढण्याची शक्यता आहे. त्यामुळे जिल्ह्यातील नागरिकांना दुष्काळाच्या झळा बसताना दिसत आहेत.

याबाबत सविस्तर माहिती अशी की, बुलढाणा जिल्ह्यात पाणीटंचाईची दाहकता वाढली असून, टैंकरग्रस्त जिल्ह्याच्या दिशेने वाटचाल सुरू झाली आहे. वर्तमान स्थितीत जिल्ह्यातील ४६ गावांना ४७ टँकरद्वारे पाणीपुरवठा करावा लागत असल्याचे एकंदरीत चित्र आहे. गेल्या चार वर्षातील टैंकरग्रस्त गावांची ही वर्तमान स्थितीत सर्वाधिक संख्या आहे.

त्यामुळे येत्या काळात यामध्ये आणखी वाढ होण्याची भीती आहे. मधल्या काळात जिल्ह्यात दुपटीने टँकरची संख्या वाढली होती. ही परिस्थिती पाहता मे अखेर जिल्ह्यात ८२ च्या आसपास गावांना टँकरने पाणीपुरवठा करावा लागण्याची भीती व्यक्त होत आहे. टंचाईच्या दृष्टीने आठ तालुक्यातील ग्रामीण भागातील पाणीटंचाईची समस्या गंभीर बनत आहे. १३६ गावांसाठी २६८ विहिरी अधिग्रहित कराव्या लागल्या आहेत.

एकट्या देऊळगाव राजात २८ गावांसाठी तब्बल ५२ विहीर आधार बनल्या आहेत, तर मेहकर तालुक्यात ४६ गावांसाठी ४७ विहिरी अधिग्रहित करण्यात आल्या आहेत. याव्यतिरिक्त शेगाव, मोताळा, चिखली, बुलढाणा, लोणार या तालुक्यात पाणीपातळी प्रचंड खाली गेल्यामुळे येथे मे महिन्यात टंचाईची तीव्रता अधिक वाढली आहे.