वाशिमच्या मालेगाव तहसील कार्यालयात धक्कादायक प्रकार घडला आहे. चेक चोरी करून पाच जणांच्या अकाउंट मध्ये ५ लाख ५८ हजार रुपये जमा करण्यात आले होते. याप्रकरणी पोलीस ठाण्यात गुन्हा दाखल करण्यात आला होता. दरम्यान या प्रकरणाचा मास्टरमाइंड याच तहसील कार्यक्षेत्रातील किन्ही येथील महसूल सेवकच निघाला असून त्याला अटक करण्यात आली आहे.

मिळालेल्या माहितीनुसार, मालेगाव तहसील कार्यालयाने १२ मार्चला तक्रार केली होती की, तहसील कार्यालयातून चेक चोरी करून ५ वेगवेगळ्या खात्यात ५ लाख ५८ हजार रुपये ट्रान्सफर करण्यात आले आहेत. याप्रकरणी मालेगाव पोलिसात गुन्हा दाखल करण्यात आला होता. पोलिसांनी तपासाची चक्रे वेगाने फिरवत दहा दिवसानंतर या प्रकरणात किन्ही येथील महसूल सेवक केशव सरोदे याला अटक करण्यात आली आहे.

हे प्रकरण एकटा महसूल सहाय्यक करू शकत नसल्याची शक्यता आहे. त्यामुळे त्याच्यासोबत अजून कोणी सहभागी असल्याची चर्चा मालेगाव मध्ये सुरू आहे. त्यामुळे या प्रकरणाच्या खोलात जाऊन तपास करण्याची गरज निर्माण झाली आहे. चार दिवसानंतर चोरी झालेली चेकबुक तहसील कार्यालयाच्या नाझर विभागात अज्ञाताने आणून टाकले होते. त्या संदर्भात मात्र पोलिसांनी बोलण्यास टाळले. सध्या आरोपी पीसीआरमध्ये असल्याची माहिती मालेगाव पोलिसांनी दिली आली आहे.