चेतन व्यास, वर्धा

वर्ध्यामध्ये दोन मित्रांचा नदीमध्ये बुडून मृत्यू झाल्याची घटना समोर आली आहे. पुलगाव येथील वर्धा नदीच्या बॅरेजजवळ ही घटना घडली आहे. दारूच्या नशेमध्ये दोघेही नदीमध्ये उतरले पण पाण्याचा अंदाज न आल्यामुळे त्यांचा नदीमध्ये बुडून मृत्यू झाल्याचा अंदाज वर्तवला जात आहे. घरी न आल्यामुळे नातेवाईकांनी शोधाशोध केली असता त्यांचा मृतदेह नदीच्या कडेला तरंगताना दिसले. या घटनेमुळे दोघांच्याही कुटुंबावर दु:खाचा डोंगर कोसळला आहे.

मिळालेल्या माहितीनुसार, वर्धा जिल्ह्याच्या पुलगाव येथील वर्धा नदीत बुडून दोन मित्रांचा मृत्यू झालाय. ही घटना पुलगावच्या वर्धा नदीवरील बॅरेजजवळ घडली. सुरेश लाडेकर (वय 57 वर्षे) आणि गणेश चचाणे (वय 55 वर्षे) अशी मृतकांची नावं आहेत. दोन्ही मृतक हे पुलगावच्या घुबडटोली परिसरात राहत होते. सुरेश आणि गणेश हे दोघेही जीवलग मित्र होते. दोघेही मजुरीचे काम करायचे आणि त्यांना दारूचे व्यसन होते.

बुधवारी सुरेश आणि गणेश दोघेही कामासाठी एकत्र घराबाहेर पडले. पण संध्याकाळपर्यंत ते घरी आलेच नाही. दोघेही घरी न आल्याने दोघांचेही नातेवाईक चिंतेत आले. त्यांच्या नातेवाईकांनी शोधाशोध केली मात्र ते भेटले नाही. गुरुवारी सकाळी वर्धा नदीच्या बॅरेजजवळ दोन मृतदेह पाण्यावर तरंगताना दिसले. मृतदेहाची तपासणी केली असता हे मृतदेह सुरेश लाडेकर आणि गणेश चचाणे यांचे असल्याचे निष्पन्न झाले.

पोलिसांनी दोघांचेहे मृतदेह ताब्यात घेऊन शवविच्छेदनासाठी रुग्णालयामध्ये पाठवले. त्याचसोबत त्यांच्या कुटुंबीयांना देखील याबाबत माहिती दिली. दोघेही दारूच्या नशेत पाण्यात उतरले असून पाण्याचा अंदाज न आल्याने ते बुडाले असल्याची माहिती आहे. पोलिसांनी मृतदेह ताब्यात घेत आकास्मिक मृत्यूची नोंद केलीय. या घटनेमुळे परिसरात हळहळ व्यक्त केली जात आहे.